‘నేనే రాజు నేనే మంత్రి’ అంటూ తేజ డైరెక్షన్‌లో రానా ఓ సినిమా చేసిన సంగతి తెలిసిందే. ఈ సినిమా అటు రానాకీ, ఇటు తేజకీ మంచి హిట్ అందించింది.
అప్పటికే గ్యాప్ తీసుకుని వున్న తేజకి మంచి కమ్ బ్యాక్ మూవీగా నిలిచింది ఈ సినిమా. అప్పుడే రానాతో ఇంకో సినిమాకీ తేజ కమిట్ అయ్యాడు. ఆ తర్వాత ఏవేవో సినిమాలు చేసి కిందా మీదా పడ్డాడు.
అన్నట్లు ఇటీవలే రానా సోదరుడు అభిరామ్‌తోనే ‘అహింస’ సినిమా తెరకెక్కించి బోల్తా కొట్టేశాడు కూడా. ఇప్పుడు మళ్లీ రానాతోనే ఇంకో సినిమా పట్టాలెక్కించబోతున్నాడు. అదే ‘రాక్షస రాజు’. ఈ సినిమా విజయ దశమి సందర్భంగా ఈ నెలలోనే లాంఛింగ్ కాబోతోంది.
అలాగే రానా ఇంకో వైపు ‘హిరణ్య కశ్యప’ సినిమాలోనూ నటిస్తున్నాడు. గుణ శేఖర్ దర్శకత్వంలో తెరకెక్కాల్సిన ఈ సినిమాకి మరో డైరెక్టర్‌తో తెరకెక్కిస్తున్నాడు రానా. ఈ సినిమా నిర్మాణంలోనూ రానా ఓ చేయి వేయబోతున్నాడనీ తెలుస్తోంది.
గుణ శేఖర్ ప్రోద్భలంతోనే ఈ ప్రాజెక్ట్ స్టార్ట్ అయ్యింది కానీ, గుణ శేఖర్ ప్రస్తుతం వున్న పరిస్థితుల్లో ఈ ప్రాజెక్ట్ ఆయనకి అంత ఆషా మాషీ కాదనుకున్నాడు కాబోలు.. సడెన్‌గా రానా తన చేతుల్లోకి తీసుకున్నాడు. ప్రతిష్టాత్మకంగా ఈ ప్రాజెక్ట్‌ని పట్టాలెక్కిస్తున్నాడట రానా. త్వరలోనే పూర్తి డీటెయిల్స్ రివీల్ కానున్నాయ్.