యూఏఈ: మస్కట్‌లోని యూఏఈ రాయబార కార్యాలయం అరేబియా సముద్రంలో ఏర్పడుతున్న తుఫాను తేజ్ కారణంగా ఏర్పడే అస్థిర వాతావరణ పరిస్థితులపై అప్రమత్తంగా ఉండాలని ఒమన్‌లోని తన పౌరులకు పిలుపునిచ్చింది. శనివారం సాయంత్రం చేసిన ట్వీట్‌లో.. సంబంధిత అధికారులు జారీ చేసిన భద్రతా సూచనలను పాటించాలని, అత్యవసర పరిస్థితుల్లో రాయబార కార్యాలయాన్ని సంప్రదించాలని ఎమిరాటీస్‌ను కోరారు. అత్యవసర సమయాల్లో యూఏఈ ఎంబసీ హాట్‌లైన్ నంబర్‌లను 0097180024 లేదా 0097180044444 సంప్రదించాలని కోరింది.మరోవైపు  ఆదివారం నాటికి ఒమన్‌ను తాకనున్న ‘తేజ్’ తుఫానుగా మారుతుందని భావిస్తున్నారు. తేజ్ తుఫాను కారణంగా సలాలా ఓడరేవు ఆదివారం సాయంత్రం 5 గంటల నుంచి (స్థానిక కాలమానం ప్రకారం) తాత్కాలికంగా మూసివేయబడుతుందని ఒమన్ శనివారం ప్రకటించింది. అరేబియా సముద్రానికి దక్షిణాన ఏర్పడిన అల్పపీడనం తుఫానుగా మారే అవకాశం ఉందని యూఏఈ జాతీయ వాతావరణ కేంద్రం (ఎన్‌సిఎం) శుక్రవారం హెచ్చరించిన విషయం తెలిసిందే.