'యంగ్‌ టైగర్‌' జూనియర్‌ ఎన్టీఆర్‌ చెన్నైలో సందడి చేస్తున్నారు. తనను కలిసిన అభిమానులకు ఆనందాన్ని పంచారు. ఆయన ప్రస్తుతం 'జనతా గ్యారేజి' చిత్రంలో నటిస్తున్నారు. కొరటాల శివ దర్శకత్వంలో తెరకెక్కుతున్న ఈ సినిమాలో సమంత, నిత్యామేనన్‌లు ఆయన సరసన ఆడిపాడుతున్నారు. దీని చిత్రీకరణ కోసం ఇటీవల చెన్నై వచ్చారు. ఆదివారం జీహెచ్‌ ఎదురుగా ఉన్న మెమోరియల్‌ హాలు వద్ద చిత్రీకరణ సాగింది. ఉదయం నగరంలోని అభిమానుల సంఘం ప్రతినిధులు ఆయన్ను కలిసి పుట్టినరోజు శుభాకాంక్షలు తెలిపారు. ఈ సందర్భంగా ఎన్టీఆర్‌ కేకు కత్తిరించారు. రెండోసారి ముఖ్యమంత్రిగా బాధ్యతలు స్వీకరించిన జయలలితకు అభినందనలు తెలిపేందుకు ఆమె అపాయింట్‌మెంట్‌ కోసం ఎన్టీఆర్‌ వేచి చూస్తున్నట్లు సమాచారం. ఒకట్రెండు రోజుల్లో ఆమెను కలిసే అవకాశమున్నట్లు తెలిసింది.