దోహా : దోహాలోని ఫార్మర్స్ జోన్ ఆఫ్ ఎక్స్‌పో 2023లో లోకల్ అగ్రికల్చర్ ఫెస్టివల్ ప్రారంభమైంది.  "ఖతార్ వ్యవసాయ ఉత్పత్తుల కోసం ఎక్స్‌పో ఫెస్టివల్" మార్చి 2024 వరకు సాయంత్రం 4 గంటల నుండి రాత్రి 10 గంటల వరకు కొనసాగుతుందని నిర్వాహకులు ప్రకటించారు. దాదాపు అన్ని రకాల స్థానిక కూరగాయలు మార్కెట్‌కు చేరుకోవడంతో ఖతార్ వ్యవసాయ సీజన్ గరిష్ట స్థాయికి చేరుకుంటున్న తరుణంలో వ్యవసాయ వ్యవహారాల శాఖ ప్రాతినిధ్యం వహిస్తున్న మునిసిపాలిటీ మంత్రిత్వ శాఖ ఈ ఫెస్టివల్ ను ప్రకటించింది. సాధారణంగా ఖతార్‌లో అత్యధిక వ్యవసాయ సీజన్ డిసెంబర్ నుండి ఫిబ్రవరి వరకు ఉంటుంది.  స్థానిక పొలాల సంఖ్య పెరగడంతో, సీజనల్ మార్కెట్లు ఈ సీజన్‌లో 14,000 టన్నుల కూరగాయలను అందజేస్తాయని అంచనా.  ఇది గత సీజన్ కంటే 20 శాతం ఎక్కువ కావడం విశేషం.