అబుదాబి: BAPS హిందూ మందిర్ సందర్శకులకు గుడ్ న్యూస్ చెప్పింది. కొత్తగా యూజర్ ఫ్రెండ్లీ ప్రీ-రిజిస్ట్రేషన్ బుకింగ్ ప్రక్రియను ప్రారంభించింది.   హిందూ మందిర్ ప్రారంభమైనప్పటి నుండి వచ్చే సందర్శకుల సంఖ్య గణనీయంగా పెరిగింది. రాబోయే ఈద్, రామనవమి మొదలైన పండుగ సెలవుల సమయంలో రద్దీ మరింత పెరుగుతుందని అధికారులు అంచనా వేస్తున్నారు. దీంతో సందర్శకుల కోసం కొత్త ప్రీ-రిజిస్ట్రేషన్ బుకింగ్ ప్రక్రియ అమలు చేయనున్నట్లు మందిర్ ప్రతినిధి తెలిపారు. బుకింగ్ ప్రక్రియ ద్వారా సందర్శకులు వారి ప్రాధాన్యత తేదీ, సమయ స్లాట్‌ను ఎంచుకోవచ్చని, వేచి ఉండే సమయాన్ని తగ్గించవచ్చని , ఈ విధానం సందర్శకుల అనుభవాన్ని మెరుగుపరుస్తుందని పేర్కొన్నారు. మరింత సమాచారం కోసం,  ప్రీ-రిజిస్ట్రేషన్ బుకింగ్ కోసం https://www.mandir.ae/visitని సందర్శించాలని సూచించింది. సోమవారాల్లో BAPS హిందూ మందిర్ ప్రజలకు మూసివేయబడిందని గుర్తు చేశారు.