మస్కట్: ప్రైవేట్ రంగానికి కూడా క్రిమినల్ బాధ్యతను వర్తింపజేయడం ద్వారా లంచగొండితనాన్ని అరికట్టేందుకు ఒమన్ కీలకమైన చట్టపరమైన సంస్కరణలను ప్రవేశపెట్టింది. 'రాయల్ డిక్రీ నం. 36/2023' కింద దేశ అవినీతి నిరోధక విధానంలో ఒక ముఖ్యమైన విస్తరణను సూచించారు.

ఈ సవరణలు శిక్షాస్మృతి (Penal Code)లో ఒక కొత్త అధ్యాయాన్ని జోడించాయి. ఇది ఒమన్ సుల్తానట్‌లో పనిచేసే ప్రైవేట్ కంపెనీలు, సంస్థలు మరియు అంతర్జాతీయ సంస్థలలో జరిగే లంచం నేరాలను ప్రత్యేకంగా ప్రస్తావిస్తుంది. ఈ డిక్రీలో భాగంగా, కార్మిక చట్టంలోని ఆర్టికల్ 146తో పాటు కొత్త సవరణలకు విరుద్ధంగా ఉన్న నిబంధనలన్నీ రద్దు చేబబడ్డాయి.

కొత్త నిబంధనల ప్రకారం, ఈ చట్టం ఇప్పుడు ప్రైవేట్ రంగంలోని యజమానులు, బోర్డ్ ఆఫ్ డైరెక్టర్ల సభ్యులు మరియు ఉద్యోగులకు వర్తిస్తుంది. విధులను నిర్వహించడం లేదా నిర్వహించకుండా ఉండటం కోసం ప్రత్యక్షంగా లేదా పరోక్షంగా బహుమతులు, వాగ్దానాలు లేదా ఏదైనా ప్రయోజనాన్ని కోరడం లేదా స్వీకరించడం వంటి చర్యలను ఈ చట్టం నేరంగా పరిగణిస్తుంది. ముఖ్యంగా, ఉద్యోగ విధులను ఉల్లంఘించే చర్యలకు మరియు ఉద్యోగి బాధ్యతల పరిధిలోకి వచ్చే చర్యలకు మధ్య ఈ నిబంధనలు వ్యత్యాసాన్ని చూపిస్తాయి. 

తమ ఉద్యోగ విధులను ఉల్లంఘించి లంచం తీసుకున్న వ్యక్తులకు ఒకటి నుండి మూడు సంవత్సరాల వరకు జైలు శిక్ష, అలాగే పొందిన లేదా వాగ్దానం చేసిన ప్రయోజనం విలువకు తక్కువ కాకుండా జరిమానా విధించబడుతుంది. ఉద్యోగి పాత్ర పరిధిలోకి వచ్చే విధులను నిర్వహించడం లేదా నిర్వహించకుండా ఉండటంతో కూడిన తీవ్రమైన సందర్భాల్లో, జైలు శిక్ష కనీసం మూడు సంవత్సరాల నుండి గరిష్టంగా ఐదు సంవత్సరాల వరకు విధిస్తారు.