ప్రబాస్ హీరోగా తెరకెక్కుతోన్న ‘కల్కి 2898ఏడీ’ జూన్‌లో విడుదలకు సిద్ధంగా వున్న సంగతి తెలిసిందే. ఈ సినిమా స్టార్టింగ్ నుంచీ ఓ రేంజ్‌లో అంచనాలున్న సంగతీ తెలిసిందే.

భారీ నుంచి అతి భారీ బడ్జెట్ మూవీగా ఈ సినిమాని అత్యంత ప్రతిష్టాత్మకంగా వైజయంతీ మూవీస్ బ్యానర్ అధినేత అశ్వనీదత్ నిర్మిస్తున్నారు.

గ్రాఫిక్స్ వర్క్ న భూతో న భవిష్యతి అనేలా చేస్తున్నారు ఈ సినిమాకి. టైమ్ ట్రావెల్ నేపథ్యంలో భవిష్యత్ కాలాన్ని చూపించబోతున్నారు ఈ సినిమాతో.

అంటే.. ఆటోమెటిగ్గా ఈ సినిమాపై అంచనాలుంటాయ్. ఇక, నటీనటుల పరంగా కూడా స్టార్ కాస్టింగ్ యాక్ట్ చేస్తున్నారు. ప్యాన్ ఇండియా కాదు, ప్యాన్ వరల్డ్ సినిమాగా ‘కల్కి’ రూపొందుతోంది.

కాగా, తాజాగా ఈ సినిమా గురించి ఓ గాసిప్ చక్కర్లు కొడుతోంది. ఈ సినిమాలో ఒకే ఒక్క పాట తప్ప సినిమా ఫార్ములా ప్రకారం ఐదు లేదా ఆరు పాటలుండవని అంటున్నారు.

అయితే, సిట్యువేషనల్‌గా సాగే బ్యాక్ గ్రౌండ్ సాంగ్ బిట్స్ వుంటాయట. ఈ ప్రచారంలో నిజమెంతో కానీ, ప్రబాస్ సరసన ఇద్దరు అందగత్తెలు ఈ సినిమాలో నటిస్తున్నారు. దీపికా పదుకొనె, దిశా పటానీ. అలాంటిది ఈ కాంబోపై పాటల్లేకపోవడం అంటే ఒకింత ఆలోచించాల్సిన అంశమే. కానీ, ఈ ప్రచారంలో నిజమెంతో తెలియాల్సి వుంది.