చందమామ కాజల్ అగర్వాల్‌కి ఈ మధ్య పదే పదే అన్యాయం జరుగుతూ వస్తోంది. మెగాస్టార్ చిరంజీవి నటించిన ‘ఆచార్య’ సినిమాలో కాజల్ హీరోయిన్‌గా ఎంపికైన సంగతి తెలిసిందే.
ఆమెతో కొన్ని సీన్లు కూడా చిత్రీకరించారు. ఒక పాట కూడా వుంది అందులో. అయితే, చివరికి వచ్చేసరికి కాజల్ క్యారెక్టర్ మొత్తానికి లేపేశారు. అప్పట్లో అదో సంచలనం. అయితే, కాజల్‌కివ్వాల్సిన రెమ్యునరేషన్ ఇచ్చి, గౌరవంగా ఆమె అనుమతితోనే ఆ సినిమా నుంచి ఆ క్యారెక్టర్ తీసేశారనుకోండి.
మళ్లీ ఇప్పుడు కూడా కాజల్ అదే పరిస్థితిని ఎదుర్కొంటోందా.? అంటే అవుననే అనుమానాలే వస్తున్నాయ్. ‘ఇండియన్ 2’ సినిమాలో కాజల్ అగర్వాల్ హీరోయిన్ అంటూ ప్రచారం నడిచింది.
అయితే, మరికొద్ది రోజుల్లోనే ఈ సినిమా రిలీజ్‌కి రెడీగా వుంది. కానీ, ఈ సినిమా ప్రమోషన్లలో ఎక్కడా కాజల్ కనిపించడం లేదు. టీజర్‌లో కానీ, ట్రైలర్ర‌లో కానీ, ఒక్క పోస్టర్‌లో కానీ కాజల్ కనిపించలేదింతవరకూ.
మొన్న ముంబయ్‌లో జరిగిన ఈవెంట్, తాజాగా హైద్రాబాద్‌లో జరిగిన ఈవెంట్.. ఎక్కడా కాజల్ కనిపించలేదు. మరో హీరోయిన్ రకుల్ ప్రీత్ సింగ్, ప్రియా భవానీ శంకర్ సైతం కనిపిస్తున్నారు. కానీ, కాజల్ జాడే లేదెక్కడ.
రీసెంట్‌గా కాజల్ నటించిన ‘సత్యభామ’ సినిమా ప్రమోషన్లలో కాజల్ చక్కగా కనిపించింది. ఒకవేళ ఈ సినిమాలో వుండి వుంటే కనుక ప్రమోషన్లకు రాకుండా వుంటుందా.? ఈ విషయంలో కాజల్ కానీ, ‘ఇండియన్ 2’ టీమ్ కానీ స్పందించాల్సి వుందంటూ కాజల్ అభిమానులు కోరుతున్నారు.