మూలనపడిన ఆశీర్వచనంగా మిగిలిన 'ఆయుష్మాన్ భవ' సూర్య పుణ్యమా అని '24' సినిమాతో కాస్త ఆయువు పోసుకుని మళ్ళీ 'తెర'పైకి వచ్చింది. విలన్ అయినప్పటికీ ఆత్రేయ పాత్రతో 'ఆయుష్మాన్ భవ' అని దర్శకుడు విక్రమ్ చెప్పించడం ఈ సినిమాలో ప్రత్యేకత. ప్రస్తుతం ఈ 'ఆయుష్మాన్ భవ'కు ఇంకాస్త ఆయుష్షు పెంచుతున్నాడు మరో దర్శకుడు త్రినాథరావు నక్కిన. 'సినిమా చూపిస్తా మావా' సినిమాతో గతేడాది సూపర్ డూపర్ హిట్ కొట్టిన త్రినాథరావు కథతో ఓ సినిమా రానుంది. మారుతి నిర్మాణంలో రూపొందనున్న ఈ సినిమాకి 'ఆయుష్మాన్ భవ' అనే టైటిల్‌ను ఖరారు చేశారు. మారుతి టాకీస్ సంస్థలో ప్రొడక్షన్ నెం-12గా తెరకెక్కనున్న ఈ సినిమా రచయిత పరచూరి వెంకటేశ్వరరావు, దర్శకుడు శ్రీకాంత్ అడ్డాల చేతుల మీదుగా ప్రారంభమయింది.
మారుతి టాకీస్‌తో పాటు శ్రీ సుబ్రమణ్యేశ్వర సినీ క్రియేషన్స్ సంయుక్తంగా నిర్మిస్తున్న ఈ సినిమాలో 'భద్రం బీకేర్ ఫుల్' ఫేమ్ చరణ్ తేజ్ హీరోగా నటిస్తున్నాడు. ఈ సినిమాకి సంబంధించి మరిన్ని వివరాలు త్వరలో వెల్లడించి, సెట్స్‌మీదికి తీసుకెళ్ళేందుకు సన్నాహాలు చేస్తున్నట్టు నిర్మాత జి.సుబ్రహ్మణ్యం తెలిపారు. ఇదిలా ఉంటే నాని-త్రినాథరావు కాంబినేషన్‌లో రానున్న సినిమా ఆగష్ట్ నుండి సెట్స్ మీదికెళ్ళనుందని సమాచారం.