యోగా గురు రాందేవ్ బాబా మరో మెగా ప్రాజెక్ట్‌ను మొదలుపెట్టనున్నారు. ఇప్పటికే పతంజలి గ్రూప్ పేరుతో విజయవంతమైన ఆయన.. ఇప్పుడు అతిపెద్ద యోగా ఇన్‌స్టిట్యూట్ ఏర్పాటు చేయడానికి సిద్ధమవుతున్నారు. హర్యానాలోని ఫరీదాబాద్ సమీపంలో ఉన్న కోట్ అనే గ్రామంలో వెయ్యి ఎకరాల్లో ఈ యోగా ఇన్‌స్టిట్యూట్ నెలకొల్పబోతున్నట్లు సమాచారం. దీనిపై రామ్‌దేవ్ బాబా ప్రతినిధిని ప్రశ్నించగా.. అంత తొందరెందుకు, ఆయనే దీనిపై ప్రకటన చేస్తారని చెప్పారు. మంగళవారం యోగా డే సందర్భంగా ఫరీదాబాద్‌లో లక్షల మందితో యోగా కార్యక్రమం నిర్వహిస్తున్నారు. ఈ కార్యక్రమంతో ఏడు ప్రపంచ రికార్డులను సృష్టించబోతున్నామని నిర్వాహకులు తమ ఆహ్వానంలో వెల్లడించారు.
యోగా ఇన్‌స్టిట్యూట్‌పై గతంలోనే రాందేవ్ బాబా తన మనసులో మాట బయటపెట్టారు. హర్యానాలో జరిగిన ఓ ఈవెంట్‌లో మాట్లాడుతూ 5 వేల కోట్లతో ఓ భారీ యూనివర్సిటీ, ఇంటర్నేషనల్ హెల్త్ సెంటర్ ఏర్పాటు చేయాలనుకుంటున్నట్లు అప్పట్లో ఆయన చెప్పారు.