కావలసినవి: చికెన్‌ లెగ్స్‌ 8, పెరుగు 200 గ్రా, గరం మసాలా 10 గ్రా, కర్బూజా గింజలు 100 గ్రా, జీడిపప్పు పలుకులు 100గ్రా, బాదం 30గ్రా, గసగసాలు 30గ్రా, చిలోంజి పప్పు 30గ్రా, మీగడ 50గ్రా, దానిమ్మ రసం 200గ్రా, దానిమ్మ పండు 1, పచ్చ యాలుకల పొడి 1టీ స్పూన్‌, తెల్ల మిరియాల పొడి 1టీ స్పూన్‌, పచ్చి మిరపకాయల ముద్ద 1 టేబుల్‌ స్పూన్‌, నూనె 50 మిలీ.
ఎలా చేయాలి
చికె న్‌కి ఉప్పు, కొద్దిగా నూనె పట్టించి పక్కన పెట్టండి. జీడిపప్పు, గసగసాలు, బాదం, కర్బూజా గింజలను ఉడికించి నీటిని వంచేసి మెత్తగా రుబ్బండి. మందపాటి మూకుడులో నూనెను వేడి చేసి దానిలో గరం మసాలా వేయండి. పప్పుల ముద్దను చిలకరించిన పెరుగులో కలిపి మూకుడులో వేయండి. సన్నటి సెగ మీద నూనె పైకి తేలే వరకు ఉడికించండి. ఉప్పు, తెల్లమిరియాల పొడి, పచ్చి మిరపకాయల ముద్దను ఈ మిశ్రమంలో వేసి కలియబెట్టండి. యాలకల పొడి, దానిమ్మరసం కూడా కలిపి, ఆ తర్వాత చికెన్‌ లెగ్స్‌ను వేయండి. సన్నటి సెగ మీద చికెన్‌ ఉడికే వరకు మగ్గనివ్వండి. చివరలో మీగడ కలిపి కింద కి దించండి. మీగడ, దానిమ్మ గింజలు వేసి వేడిగా వడ్డించండి.