జర్మనీలో భారతీయ ఉద్యోగులకు భారీ డిమాండ్ ఉంది.ఈ డిమాండ్ ఎందుకు పెరిగిందంటే జర్మనీ ప్రస్తుతం వృద్ధాప్య జనాభా మరియు అర్హత కలిగిన కార్మికుల కొరతతో ఇబ్బంది పడుతోంది. ఈ సమస్యను పరిష్కరించడానికి, జర్మనీ ప్రభుత్వం భారతీయ ఉద్యోగులను ఆకర్షించడానికి అనేక చర్యలు తీసుకుంటోంది. ముఖ్యంగా, హెల్త్ కేర్, ఐటీ, ఇంజినీరింగ్ రంగాల్లో నైపుణ్యమున్న భారతీయ ఉద్యోగులకు పెద్ద ఎత్తున అవకాశాలు ఉన్నాయి.
మరోవైపు వీసా ప్రాసెసింగ్ సమయాన్ని తగ్గించడం ద్వారా నైపుణ్యం కలిగిన భారతీయులకు ఉద్యోగ అవకాశాలు మరింత సులభతరం అవుతున్నాయి.గతంలో 9 నెలలు పట్టే వీసా ప్రాసెసింగ్, ఇప్పుడు కేవలం రెండు వారాలకు తగ్గించబడింది. జర్మనీ ప్రభుత్వం నైపుణ్యం కలిగిన కార్మికులను ఆకర్షించడానికి ఈ చర్యలు తీసుకుంటోంది. జర్మనీలో భారతీయ కంపెనీలు కూడా భారీగా పెట్టుబడులు పెట్టడం వల్ల, భారతీయులకు ఉద్యోగ అవకాశాలు విస్తృతంగా లభిస్తున్నాయి.

ఇంకా జర్మనీలో భారతీయ ఉద్యోగులకు అనేక సౌకర్యాలు అందుబాటులో ఉన్నాయి. ముఖ్యంగా, విద్యా వ్యవస్థ విషయానికి వస్తే, జర్మనీలో ఉన్నత విద్యా సంస్థలు ప్రపంచవ్యాప్తంగా ప్రసిద్ధి చెందాయి. భారతీయ విద్యార్థులు ఇక్కడ సులభంగా అడ్జస్ట్ అవ్వగలరు.జర్మనీలోని పాఠశాలలు మరియు విశ్వవిద్యాలయాలు అధునాతన సాంకేతిక పరిజ్ఞానం, పరిశోధన, మరియు నైపుణ్యాల అభివృద్ధికి ప్రాధాన్యత ఇస్తాయి. భారతీయ విద్యార్థులకు అనుకూలంగా ఉండేలా అనేక కోర్సులు మరియు ప్రోగ్రాములు అందుబాటులో ఉన్నాయి.

భారతీయ సి బి ఎస్ సి పాఠశాలలు కూడా జర్మనీలో ఉన్నాయి.ఈ పాఠశాలలు భారతీయ విద్యా విధానాన్ని అనుసరిస్తూ, భారతీయ విద్యార్థులకు సౌకర్యవంతమైన విద్యను అందిస్తాయి. ఈ పాఠశాలలు భారతీయ విద్యార్థులకు సాంస్కృతిక మరియు భాషా పరమైన అనుభవాలను కూడా అందిస్తాయి, తద్వారా వారు తమ సొంత సంస్కృతిని మరచిపోకుండా ఉంటారు.

ఇక భారతీయ ఉద్యోగులు జర్మనీలో పనిచేయడం వల్ల అనేక ప్రయోజనాలు ఉన్నాయి. జర్మనీలో సగటు స్థూల నెలసరి వేతనం సుమారు 5,400 యూరోలు, అంటే సుమారు రూ.4,92,037 ఉంటుంది. ఇది ఫుల్ టైమ్ ఉద్యోగుల సగటు వేతనం కంటే 41% ఎక్కువ. అలాగే, జర్మనీలో జీవన ఖర్చులు తక్కువగా ఉంటాయి. ఒక వ్యక్తికి సాధారణంగా నెలకు 200 నుండి 350 యూరోల వరకు ఖర్చు అవుతుంది. షేరింగ్ ప్రైవేట్ గదుల ఖర్చు 300-650 యూరోల మధ్య, ప్రైవేట్ సింగిల్ గదుల ఖర్చు 450-750 యూరోల మధ్య ఉంటుంది.

ఇటీవల జర్మనీ ప్రభుత్వం వీసా సరళీకరణ, అర్హత గుర్తింపు, కల్చరల్ అండ్ వర్క్ ప్లేస్ ఇంటిగ్రేషన్ వంటి అనేక కార్యక్రమాలను ప్రవేశపెట్టింది. వీసా సరళీకరణ ద్వారా, 2024 చివరి నాటికి డిజిటల్ వీసాను ప్రవేశపెట్టనుంది.అర్హతలను గుర్తించే ప్రక్రియను క్రమబద్ధీకరించడం జరుగుతుంది. కల్చరల్ ఇంటిగ్రేషన్ ట్రైనింగ్ ద్వారా, జర్మనీలో జీవితానికి అలవాటు పడేందుకు కార్మికులకు సహాయం చేస్తుంది.

మొత్తం మీద, జర్మనీలో భారతీయులకు ఉద్యోగాలు, విద్యా అవకాశాలు, మరియు సి.బి.ఎస్.సి పాఠశాలలు అందుబాటులో ఉండటం వల్ల, వారు సులభంగా అక్కడ స్థిరపడగలరు. జర్మనీ ప్రభుత్వం కూడా భారతీయులకు అనుకూలంగా ఉండే విధంగా అనేక చర్యలు తీసుకుంటోంది. ఈ విధంగా, జర్మనీలో భారతీయ ఉద్యోగులకు భారీ డిమాండ్ ఉంది. 

--వేణు పెరుమాళ్ల(మాగల్ఫ్ ప్రతినిధి)