అదేంటీ చిరంజీవి వయసు 50కి తగ్గిపోయిందా.? అనుకుంటున్నారా.? కళామతల్లికి చిరంజీవి అనే వరప్రసాదం దొరికి 50 ఏళ్లు పూర్తయ్యింది.
అదేనండీ మెగాస్టార్ చిరంజీవి నట ప్రస్థానానికి 50 ఏళ్లన్నమాట. తాజాగా ఈ విషయాన్ని గుర్తు చేసుకుంటూ, చిరంజీవి తన సోషల్ మీడియా హ్యాండిల్‌లో ఓ ఫోటో పోస్ట్ చేశారు.
బీకామ్ రెండో సంవత్సరం చదువుతున్న రోజుల్లోని ఫోటో అది. కాలేజీ ఫంక్షన్‌లో భాగంగా వేసిన రంగస్థల నాటకంలో ఉత్తమ నటుడి బహుమతి అందుకున్న ఫోటో అది.
అప్పటి నుంచే చిరంజీవి నట ప్రస్థానం మొదలయ్యింది. అలా ఇప్పటి వరకూ కొనసాగుతూనే వుంది. కళామతల్లికి అప్పుడు దొరికిన వర ప్రసాదమే ఈ కొణిదెల శివ శంకర వర ప్రసాద్ రావు.
సోషల్ మీడియాలో చిరంజీవి పెట్టిన పోస్ట్ తెగ వైరల్ అవుతోంది. పేరుకు తగ్గట్లుగానే నిజమైన కళామతల్లి వర ప్రసాదం ఆయన అంటూ ఈ పోస్ట్‌కి లైకులూ, షేర్లూ పోటెత్తుతున్నాయ్.
మరోవైపు చిరంజీవి ప్రస్తుతం ‘విశ్వంభర’ సినిమా చేస్తున్నా సంగతి తెలిసిందే. ఈ సినిమా వచ్చే ఏడాది ఏప్రిల్‌లో రిలీజ్ కానుంది.