అమరావతి: ఆంధ్రప్రదేశ్ ప్రభుత్వం గూగుల్ సంస్థతో ఒక కీలక ఒప్పందం కుదుర్చుకుంది.ఈ ఒప్పందం ద్వారా రాష్ట్రంలో ఐటీ రంగం అభివృద్ధికి గూగుల్ సంస్థ పెద్ద ఎత్తున పెట్టుబడులు పెట్టనుంది. ముఖ్యమంత్రి చంద్రబాబు నాయుడు, మంత్రి నారా లోకేశ్ సమక్షంలో గూగుల్ ప్రతినిధులు ఈ ఒప్పందంపై సంతకాలు చేశారు. ఈ ఒప్పందం ప్రకారం, గూగుల్ సంస్థ విశాఖపట్నంలో వ్యూహాత్మక పెట్టుబడులు పెట్టనుంది.గూగుల్ గ్లోబల్ నెట్‌వర్కింగ్ అండ్ ఇన్ఫ్రాస్ట్రక్చర్ ఉపాధ్యక్షుడు బికాశ్ కోలే నేతృత్వంలో గూగుల్ ప్రతినిధులు ముఖ్యమంత్రి చంద్రబాబు, మంత్రి నారా లోకేశ్‌తో సమావేశమయ్యారు.ఈ సమావేశంలో గూగుల్ సంస్థ రాష్ట్రంలో ఐటీ రంగంలో విప్లవాత్మక మార్పులు తీసుకురావడానికి తమ ప్రణాళికలను వివరించింది.

గూగుల్ సంస్థతో ఈ ఒప్పందం ద్వారా రాష్ట్రంలో పటిష్టమైన టెక్నాలజీ ఎకో సిస్టం ఏర్పడుతుంది. ఈ ఒప్పందం వల్ల ఉపాధి అవకాశాలు పెరుగుతాయని, రాష్ట్ర ఐటీ రంగం మరింత అభివృద్ధి చెందుతుందని ముఖ్యమంత్రి చంద్రబాబు తెలిపారు. గూగుల్ ప్రతిపాదిత పెట్టుబడులను స్వాగతిస్తూ, పాలసీ నిబంధనల మేరకు వారికి ప్రోత్సాహకాలు అందిస్తామని ఆయన వెల్లడించారు.

ఈ ఒప్పందం ద్వారా గూగుల్ సంస్థ రాష్ట్రంలో వివిధ అంశాల్లో సాంకేతిక సహకారం అందించనుంది. ముఖ్యంగా, ఆర్టిఫిషియల్ ఇంటెలిజెన్స్ (ఏఐ) సేవలు విస్తృతంగా అందుబాటులోకి రానున్నాయి. విద్యార్థులు, డెవలపర్లకు ఏఐకు సంబంధించి శిక్షణ కార్యక్రమాలు నిర్వహించనున్నారు. డేటా ఎనలిటిక్స్, సైబర్ సెక్యూరిటీ వంటి రంగాల్లో గూగుల్ సహకారం అందించనుంది. ఈ ఒప్పందం ద్వారా రాష్ట్రంలో సాంకేతిక రంగంలో విప్లవాత్మక మార్పులు రానున్నాయని, ప్రజలకు మెరుగైన సేవలు అందించడంలో ఇది కీలక పాత్ర పోషిస్తుందని ముఖ్యమంత్రి చంద్రబాబు ధీమా వ్యక్తం చేశారు.