చాలామంది తుప్పు పట్టిన మేకులు, ఇనుప ముక్కలు గుచ్చుకోవడం వల్లనే సెప్టిక్‌ అయ్యి, తద్వారా ధనుర్వాతంలాంటి జబ్బులు వచ్చే అవకాశం ఉందని భావిస్తారు. కానీ నిజానికి ధనుర్వాతం కలిగించే బాక్టీరియా సిద్ధబీజాలు మట్టి, దుమ్ము, ధూళి ఇలా ఎక్కడైనా ఉండొచ్చు. కీటకాలు, కుక్కకాట్లు లేదా ఇతర జంతువుల్లాంటివి కరవడం వల్ల కూడా వచ్చే అవకాశం ఉందని నిపుణుల ద్వారా వెల్లడైన విషయం. శరీరం మీద ఎక్కడైనా గాయంలాంటివి అయినపుడు ఈ వ్యాధిని కల్గించే సూక్ష్మజీవులు చర్మం ద్వారా రక్తంలోనికి ప్రవేశించి, తద్వారా వెన్నుపాము, మెదడుకు వ్యాపిస్తాయి. ఇలా చూస్తుండగానే వ్యాధి కొన్ని రోజుల్లోనే తీవ్ర రూపం దాల్చుతుంది. మెడ బిగుసుకుపోవడం, మింగడానికి కష్టమవడం, కడుపు బల్లలాగా మారిపోవడంలాంటివి ముఖ్యంగా ఈ వ్యాధి లక్షణాలుగా చెప్పవచ్చు. అయితే ఈ వ్యాధి ఒక్కసారి సంక్రమించినాక నియంత్రించడం అసాధ్యం. అందుకే ప్రపంచ ఆరోగ్య శాఖ వారు ఈ వ్యాధికి సంబంధించిన టీకాలను అందుబాటులోకి తీసుకురావడంతో దీన్ని కొంతవరకూ నియంత్రించడం జరుగుతుంది. అయితే ప్రతీ పదేళ్లకోసారి ఖచ్చితంగా ఈ టీకా ను వేయించుకోవాలి. కొన్ని సమయాల్లో పెద్ద పెద్ద గాయాలే కాకుండా, పెంపుడు జంతువులు కరవడం, కొన్ని రకాల కీటకాల కాట్లు వంటి వాటి ద్వారా కూడా ఈ వ్యాధి సోకే ప్రమాదం ఉంది. అందుకే తప్పనిసరిగా ఈ టీకాని తీసుకోవడం మేలని వైద్యుల సలహా.