మస్కట్: ఎలక్ట్రానిక్ చెల్లింపు లావాదేవీలపై విధించే రుసుములకు సంబంధించి పారదర్శకత అవసరమని షూరా కౌన్సిల్ ఎకనామిక్ అండ్ ఫైనాన్షియల్ కమిటీ సభ్యులు సూచించారు.  సెంట్రల్ బ్యాంక్ ఆఫ్ ఒమన్ (CBO) నుండి అనేక మంది అధికారులతో జరిగిన సమావేశంలో ఈ మేరకు సూచనలు చేశారు.  ఎలక్ట్రానిక్ చెల్లింపు సేవల కోసం దుకాణ యజమానులపై బ్యాంక్ విధించిన రుసుములపై కూడా వారు చర్చించారు. వ్యాపార ప్రక్రియలను సులభతరం చేయడానికి ఎలక్ట్రానిక్ చెల్లింపు వ్యవస్థను నిరంతరం అభివృద్ధి చేయవలసిన అవసరం ఉందని ఈ సందర్భంగా అభిప్రాయపడ్డారు. ఇది వివిధ వాణిజ్య కార్యకలాపాల అభివృద్ధిని నేరుగా ప్రభావితం చేస్తుందని, ఇది ఒమన్ సుల్తానేట్‌లో ఆర్థిక శ్రేయస్సుకు దోహదం చేస్తుందన్నారు. రెండవ వార్షిక సెషన్ (2024-2025) రెండవ సమావేశంలో భాగంగా, ఆర్థిక కమిటీ అధిపతి అహ్మద్ సయీద్ అల్-షార్కీ అధ్యక్షతన ఈ సమావేశం జరిగింది.

సెంట్రల్ బ్యాంక్ నిపుణుల ప్రెజెంటేషన్‌తో సమావేశం ప్రారంభమైంది. ఈ సమయంలో వారు ఒమన్ సుల్తానేట్‌లో గత 20 సంవత్సరాలుగా అమలులో ఉన్న చెల్లింపు వ్యవస్థ గురించి చర్చించారు. చెల్లింపు వ్యవస్థలు, ఆర్థిక సేవలలో CBO పాత్రను, అలాగే 2024లో ప్రారంభించబడిన కీలక సేవలు, సిస్టమ్‌లను ప్రదర్శించారు. డిజిటల్ చెల్లింపు వ్యవస్థ పరిణామం, ఎలక్ట్రానిక్ చెల్లింపు సేవల విస్తరణ, వినియోగదారుల కోసం ఎలక్ట్రానిక్ చెల్లింపు సేవలను ఉపయోగించడం వల్ల కలిగే ప్రయోజనాలు, లక్ష్యాలను వివరించారు.