దుబాయ్: డ్రగ్స్‌ను ఇతరులకు అందించేలా సహకరించినందుకు ఓ మహిళకు దుబాయ్‌లో ఐదేళ్ల జైలు శిక్ష,  50,000 దిర్హామ్‌ల జరిమానా పడింది. శిక్షాకాలం ముగిసిన తర్వాత ఆమెను యూఏఈ నుంచి బహిష్కరించాలని కూడా ఆదేశించింది. రెండు సైకోట్రోపిక్ పదార్ధాలు( యాంఫేటమిన్,మెథాంఫేటమిన్) సరఫరా చేసినందుకు దుబాయ్ క్రిమినల్ కోర్ట్ దోషిగా నిర్ధారించింది. ఈ కేసు ఏప్రిల్ 2, 2024లో చోటుచేసుకుంది. దుబాయ్‌లోని సత్వా ప్రాంతంలో ఒక వ్యక్తి డ్రగ్స్ వాడుతున్నాడని దుబాయ్ పోలీసుల యాంటీ నార్కోటిక్స్ విభాగానికి సమాచారం వచ్చింది. అనుమానితుడిని అదుపులోకి తీసుకొని విచారించారు. తాను యాంఫేటమిన్, మెథాంఫేటమిన్‌లను తీసుకున్నట్లు అంగీకరించాడు. రెండు పర్యాయాలు సదరు మహిళ నుంచి డ్రగ్స్ తీసుకున్నట్లు తెలిపాడు. ఆ వ్యక్తి నివాసం నుండి నాలుగు క్రిస్టల్ మెత్ ప్యాకెట్లను స్వాధీనం చేసుకున్నారు.