మస్కట్: నంబియో ఇటీవల ప్రచురించిన ‘వరల్డ్ కాస్ట్ ఆఫ్ లివింగ్ ఇండెక్స్’ 2025 ఎడిషన్ ప్రకారం.. గల్ఫ్ కోఆపరేషన్ కౌన్సిల్ (జిసిసి) ప్రాంతంలో అత్యంత అఫార్డబుల్ దేశంగా ఒమన్ తన స్థానాన్ని నిలుపుకుంది. 100 పాయింట్ల స్కోర్‌తో న్యూయార్క్ నగరాన్ని బెంచ్‌మార్క్‌గా ఉపయోగించి సగటు అద్దె ధరలు, కిరాణా ఖర్చులు, రెస్టారెంట్ ధరలు, స్థానిక కొనుగోలు శక్తితో సహా వివిధ అంశాలను ఇండెక్స్ అంచనా వేస్తుంది.

ప్రపంచవ్యాప్తంగా ఒమన్ 139 దేశాలలో 93వ స్థానంలో ఉంది. జీవన వ్యయ సూచిక 39.8తో ఉంది. జీసీసీలో నివాసితులు, ప్రవాసులకు ఇది ఒక ఆకర్షణీయమైన గమ్యస్థానంగా ఉందని తెలిపింది. జీవన వ్యయ సూచిక 40.4తో కువైట్ ప్రపంచవ్యాప్తంగా 62వ స్థానంలో ఉండగా, సౌదీ అరేబియా 41.9 ఇండెక్స్‌తో ప్రపంచవ్యాప్తంగా 56వ స్థానంలో ఉంది. ఖతార్ 47.5 ఇండెక్స్‌తో ప్రపంచవ్యాప్తంగా 44వ స్థానంలో ఉండగా, బహ్రెయిన్ 48.3 ఇండెక్స్‌తో ప్రపంచవ్యాప్తంగా 41వ స్థానంలో ఉంది. యునైటెడ్ అరబ్ ఎమిరేట్స్ 54.1 సూచికతో ప్రపంచవ్యాప్తంగా 31వ స్థానంలో ఉంది. ఈ ప్రాంతంలో యూఏఈ అత్యంత ఖరీదైన దేశంగా ఉంది.

ఒమన్‌లో, సిటీ సెంటర్‌లలో సింగిల్ బెడ్ రూమ్ అపార్ట్‌మెంట్ సగటు నెలవారీ అద్దె US$476, సిటీ సెంటర్‌ల వెలుపలి ప్రాంతాల్లో US$336కి పడిపోయింది. చవకైన రెస్టారెంట్‌లో భోజనం చేయడానికి US$5.61 ఖర్చవుతుంది, అయితే లీటరు గ్యాసోలిన్ ధర కేవలం US$0.62 గా ఉంది. ప్రపంచవ్యాప్తంగా ఇండెక్స్ ప్రకారం అత్యల్ప జీవన వ్యయం కలిగిన దేశాలలో పాకిస్తాన్, లిబియా, ఈజిప్ట్, ఇండియా, ఆఫ్ఘనిస్తాన్, మడగాస్కర్, బంగ్లాదేశ్, రష్యా, పరాగ్వే ఉన్నాయి. మరోవైపు అత్యధిక జీవన వ్యయం కలిగిన దేశాల జాబితాలో స్విట్జర్లాండ్, యూఎస్ వర్జిన్ దీవులు, ఐస్‌లాండ్, బహామాస్, సింగపూర్, హాంకాంగ్ (చైనా), బార్బడోస్, నార్వే, పాపువా న్యూ గినియా, డెన్మార్క్ ఉన్నాయి.