నాలుగు టెస్ట్‌ల సిరీస్ కోసం కోహ్లి కెప్టెన్సీలోని టీమిండియా వెస్టిండీస్ బయలుదేరింది. బుధవారం ఉదయం ముంబై ఎయిర్‌పోర్ట్ నుంచి టీమ్ విండీస్ ఫ్లైట్ ఎక్కింది. కొత్త కోచ్ కుంబ్లే సహా 16 మంది టీమ్ సభ్యులు, సపోర్టింగ్ స్టాఫ్ విండీస్ వెళ్లారు. ఈ నెల 9, 10 తేదీల్లో విండీస్ క్రికెట్ బోర్డు ప్రెసిడెంట్ ఎలెవన్‌తో సెయింట్ కీట్స్‌లో జరిగే రెండు రోజుల ప్రాక్టీస్ మ్యాచ్‌తో విండీస్ టూర్ మొదలవుతుంది. ఆ తర్వాత ఇదే వేదికలో జులై 14 నుంచి 16 వరకు మూడు రోజుల వామప్ మ్యాచ్ ఆడుతుంది టీమిండియా. తొలి టెస్ట్ ఈ నెల 21 నుంచి ఆంటిగ్వాలోని వివియన్ రిచర్డ్స్ క్రికెట్ గ్రౌండ్‌లో మొదలవుతుంది. రెండో టెస్ట్ జులై 30 నుంచి ఆగస్ట్ 3 వరకు కింగ్‌స్టన్‌లోని సబీనా పార్క్‌లో, మూడో టెస్ట్ సెయింట్ లూసియాలోని సామి నేషనల్ క్రికెట్ స్టేడియంలో, నాలుగోటెస్ట్ పోర్ట్ ఆఫ్ స్పెయిన్లోని క్వీన్స్ పార్క్ ఓవల్‌లో జరుగుతాయి. చివరిసారి 2011లో విండీస్ టూర్‌కెళ్లిన టీమిండియా.. మూడుటెస్ట్‌ల సిరీస్‌ను 1-0తో గెలుచుకుంది. ఆ సిరీస్‌తోనే టెస్ట్ అరంగేట్రం చేసిన కోహ్లి.. ఇప్పుడు కెప్టెన్‌గా, టీమ్‌లో ప్రధాన బ్యాట్స్‌మన్‌గా మరోసారి విండీస్‌కు వెళ్లడం విశేషం. విండీస్‌కు వెళ్లిన టీమ్‌: విరాట్ కోహ్లి (కెప్టెన్‌), రహానే (వైస్ కెప్టెన్‌), విజయ్‌, ధావన్‌, రాహుల్‌, పుజారా, రోహిత్‌శర్మ, సాహా, అశ్విన్‌, అమిత్ మిశ్రా, రవీంద్ర జడేజా, ఇషాంత్‌శర్మ, షమి, భువనేశ్వర్‌, షార్దూల్ ఠాకూర్‌, స్టువర్ట బిన్నీ.