దోహా: ప్రజారోగ్య మంత్రిత్వ శాఖ (MoPH) 1446 AH (2025) సీజన్ కోసం హజ్ టీకాల కోసం కీలక అప్డేట్ ప్రకటించింది.  ప్రవక్త మసీదు సందర్శకుల ఆరోగ్యం, భద్రతను కాపాడటానికి వ్యాక్సినేషన్ తప్పనిసరి అని పునరుద్ఘాటించింది. అంటు వ్యాధుల ప్రమాదాలను, వాటి సమస్యలను వ్యాక్సినేషన్ తగ్గిస్తుందని తెలిపింది. యాత్రికులు తమ ఆచారాలను సురక్షితంగా నిర్వహించడానికి వీలుగా ఈ చర్యలు రూపొందించినట్లు వెల్లడించింది.  ఈ సంవత్సరం అవసరమైన టీకాలలో యాత్రికులందరికీ తప్పనిసరి మెనింగోకోకల్ (క్వాడ్రివాలెంట్ ACYW-135) టీకా కూడా ఉందని స్పష్టం చేసింది.

65 ఏళ్లు పైబడిన యాత్రికులు, గర్భిణీ స్త్రీలు, దీర్ఘకాలిక గుండె లేదా శ్వాసకోశ వ్యాధులు, దీర్ఘకాలిక మూత్రపిండ వైఫల్యం, వంశపారంపర్య రక్త రుగ్మతలు (సికిల్ సెల్ అనీమియా మరియు తలసేమియా వంటివి), పుట్టుకతో వచ్చే లేదా పొందిన రోగనిరోధక శక్తి లోపం (రోగనిరోధక శక్తిని తగ్గించే మందులు లేదా క్యాన్సర్‌తో సహా), దీర్ఘకాలిక నాడీ సంబంధిత వ్యాధులు వంటి దీర్ఘకాలిక పరిస్థితులతో బాధపడుతున్న వ్యక్తులకు COVID-19 వ్యాక్సిన్ తప్పనిసరి. 18 ఏళ్లు అంతకంటే ఎక్కువ వయస్సు ఉన్న వారందరికీ COVID-19 వ్యాక్సిన్‌ను మంత్రిత్వ శాఖ సిఫార్సు చేస్తుంది. అందరూ యాత్రికులకు కాలానుగుణ ఇన్ఫ్లుఎంజా వ్యాక్సిన్‌ను పొందాలని మంత్రిత్వ శాఖ అడ్వైజరీ విడుదల చేసింది. 

దేశవ్యాప్తంగా ఉన్న ప్రాథమిక ఆరోగ్య సంరక్షణ కేంద్రాలలో అన్ని హజ్ వ్యాక్సిన్లు అందుబాటులో ఉన్నాయని, సౌదీ అరేబియా రాజ్యానికి ప్రయాణించడానికి కనీసం 10 రోజుల ముందు అవసరమైన టీకాలు తీసుకోవడం ముఖ్యమని తెలిపింది. హజ్ హెల్త్ గైడ్‌ గురించిన మరింత సమాచారం కోసం కాల్ సెంటర్‌ను 16000 నంబరులో  సంప్రదించవచ్చు.