రోడ్స్‌ అండ్‌ ట్రాన్స్‌పోర్ట్‌ అథారిటీ (ఆర్‌టిఎ) త్వరలో తీసుకోనున్న నిర్ణయం డ్రైవర్లకు షాక్‌ ఇవ్వనుంది. మెడికల్‌ కండిషన్‌ ఆధారంగా లైసెన్సుల రద్దు చేసే దిశగా కొత్త ఆలోచన చేస్తోంది ఆర్‌టిఎ. హైపర్‌టెన్షన్‌, ఎపిలెప్సీ, కార్డియాక్‌ సమస్యలు, అలాగే తీవ్రమైన డయాబెటిస్‌, డైమెన్షియా, మానసిక సమస్యలు వంటి వాటితో బాధపడుతున్న డ్రైవర్ల లైసెన్సులు రీవోక్‌ చేయడమే ఈ ఆలోచన తాలూకు ఉద్దేశ్యం. ప్రస్తుతానికి అయితే ఎలాంటి నిర్ణయం వెలువడకపోయినా అతి త్వరలోనే ఈ నిర్ణయం డ్రైవర్లకు ఇబ్బందికరంగా మారనుంది. కొన్ని దేశాల్లో డ్రైవర్ల మెడికల్‌ కండిషన్‌ని బట్టి లైసెన్సులు మంజూరు చేస్తారనీ, ఆ విధానాన్ని అధ్యయనం చేస్తున్నామని ఆర్‌టిఎ ముఖ్య అధికారి ఒకరు వెల్లడించారు. ఎపిలెప్సీతో బాధపడే వ్యక్తి వాహనాన్ని కంట్రోల్‌ చెయ్యలేడని ఆయన తెలిపారు. అలాగే హైపర్‌టెన్షన్‌తో బాధపడేవారు, ఇతరత్రా ఆరోగ్య సమస్యల వల్ల రహదారిపై వాహనాన్ని అదుపు చేయలేకపోతే తద్వారా ప్రమాదాలు చోటు చేసుకుంటాయని ఆ అధికారి వివరించారు.