జపాన్ ప్రభుత్వం మరోసారి సంచలన నిర్ణయం తీసుకుంది. తమ దేశంలో శాశ్వతంగా నివసించాలనుకునే విదేశీయులకు కొత్త మార్గం తెరిచింది. జనాభా తగ్గిపోవడం, వృద్ధాప్యం  పెరగడం వంటి సమస్యలను దృష్టిలో ఉంచుకుని శాశ్వత నివాసం విధానాన్ని సవరించింది.

ఇప్పుడు ప్రత్యేక నైపుణ్యాలు కలిగిన కార్మికులు, విద్యార్థులు, దీర్ఘకాలంగా జపాన్‌లో నివసిస్తున్న విదేశీయులు సులభంగా PR కోసం దరఖాస్తు చేసుకోవచ్చు.

అత్యంత ఆకర్షణీయమైన అంశం ఏమిటంటే — PR దరఖాస్తు రుసుము కేవలం 800 యెన్, అంటే దాదాపు ₹5,000 మాత్రమే! ఇది చాలా మందికి ఊహించని సులభమైన ఆఫర్‌గా మారింది.

ఎవరు అర్హులు?

• కనీసం 5 సంవత్సరాలు జపాన్‌లో ఉద్యోగం చేసినవారు, లేదా
• కుటుంబ వీసాతో 10 సంవత్సరాలు నిరంతరంగా నివసించినవారు
• ఈ రెండు వర్గాల్లో ఎవరైనా PR కోసం దరఖాస్తు చేసుకోవచ్చు.

జపాన్ పాయింట్ సిస్టమ్ ప్రకారం,

• 70 పాయింట్లు ఉన్నవారు 3 సంవత్సరాల తర్వాత,
• 80 పాయింట్లు ఉన్నవారు కేవలం 1 సంవత్సరం తర్వాతే PR కోసం దరఖాస్తు చేసుకోవచ్చు.
• జపనీస్ పౌరులతో వివాహం చేసుకున్నవారు, లేదా ఇప్పటికే PR హోల్డర్లుగా 3 సంవత్సరాలు నివసించినవారు కూడా అర్హులే.
• అలాగే జపాన్‌లో పుట్టిన పిల్లలు 1 సంవత్సరం నిరంతర నివాసం తర్వాత PR పొందగలరు.

అవసరమైన పత్రాలు:
దరఖాస్తు చేసేటప్పుడు క్రింది పత్రాలు అవసరం —

• PR దరఖాస్తు ఫారం
• వీసా మరియు నివాస కార్డు
• ఆదాయ రుజువులు, పన్ను మరియు భద్రతా రికార్డులు
• జపనీస్‌లో ధృవీకరించబడిన అనువాద పత్రాలు
• జపాన్ పౌరుడు లేదా PR హోల్డర్‌ నుండి హామీ లేఖ
• సాధారణంగా PR ప్రాసెస్ 4 నుండి 8 నెలల వరకు పడుతుంది. ఈ సమయంలో దరఖాస్తుదారు చెల్లుబాటు అయ్యే వీసాతో ఉండాలి.

PR హోల్డర్లకు లభించే ప్రయోజనాలు:

• జపాన్‌లో ఉపాధి, విద్యా అవకాశాలు మరియు వ్యాపార స్వేచ్ఛ
• కుటుంబానికి దీర్ఘకాలిక స్థిరత్వం
• పన్ను చట్టాలను పాటించే బాధ్యతతో పాటు శాశ్వత నివాస హక్కులు
• తగ్గిన రుసుము, వేగవంతమైన దరఖాస్తు విధానం, మరియు నైపుణ్యం ఉన్న వారికి ప్రత్యేక అవకాశాలు కల్పించడం ద్వారా, జపాన్ ప్రభుత్వం వలస విధానాల్లో ఒక గేమ్‌చేంజర్ అడుగు వేసిందని చెప్పవచ్చు.