రియాద్: సౌదీ అరేబియాలో రెసిడెన్సీ, వర్క్, బార్డర్ చట్టాలను ఉల్లంఘించే వారిపై అధికారులు కఠినంగా వ్యవహారిస్తున్నారు. గత వారం రోజుల్లో వివిధ చట్టాలను ఉల్లంఘించిన 21,651 మందిని అరెస్టు చేసినట్లు భద్రతా దళాలు తెలిపాయి.

ఇందులో నివాస చట్టాలను ఉల్లంఘించిన 12,745 మంది, అక్రమ సరిహద్దు దాటడానికి ప్రయత్నించిన 4,577 మంది, కార్మిక సంబంధిత చట్టాలను ఉల్లంఘించిన 4,329 మంది ఉన్నారు.  బార్డర్ క్రాస్ చేస్తూ అరెస్టయిన 1,689 మందిలో 53 శాతం మంది ఇథియోపియన్లు, 46 శాతం మంది యెమెన్లు ఉన్నారు. 

సౌదీలోకి అక్రమ ప్రవేశానికి సాయం చేసేవారికి గరిష్టంగా 15 సంవత్సరాల జైలు శిక్ష, SR1 మిలియన్ ($267,000) వరకు జరిమానా విధించడంతోపాటు వారి ఇండ్లు, వాహనాలను జప్తు చేస్తామని అంతర్గత వ్యవహారాల మంత్రిత్వ శాఖ హెచ్చరించింది.

మక్కా మరియు రియాద్ ప్రాంతాలలో టోల్-ఫ్రీ నంబర్ 911, ఇతర ప్రాంతాలలో 999 లేదా 996 నంబర్ల ద్వారా అనుమానితుల వివరాలను తెలియజేయాలని కోరింది.