ఆగస్ట్‌ నుంచి, ట్రాఫిక్‌ జరీమానాలపై 50 శాతం డిస్కౌంట్‌ ఉండబోదని అబుదాబీ పోలీస్‌ వెల్లడించింది. ఆగస్ట్‌ 1 నుంచి ఇది అమల్లోకి వస్తుంది. 2010 నుంచి ట్రాఫిక్‌ జరీమానాలపై డిస్కౌంట్‌ అమల్లోకి వచ్చింది. అయితే రోడ్డు ప్రమాదాల్ని ఇంకా తగ్గించే క్రమంలో, వాహనదారులకు జరీమానాలపై భయం పెంచేలా, రోడ్డు ప్రమాదాలపై అప్రమత్తంగా ఉండేలా చేసేందుకు జరీమానాలపై డిస్కౌంట్‌ తొలగిస్తున్నట్లు అధికారులు తెలిపారు. గత మే నెలలో 1837 మంది వాహనదారులు గంటకు 200 కిలోమీటర్ల పైబడి వేగంతో ప్రయాణించినట్లు పోలీసులు గుర్తించారు. 2016 తొలి మూడు నెలల్లో రోడ్లపై ప్రమాదాలు విపరీతంగా పెరిగాయి. దాంతో వాహనదారులకు అతి వేగంపై అప్రమత్తం చేసేందుకుగాను జరీమానాల పెంపు నిర్ణయాన్ని తీసుకున్నామని అబుదాబీ పోలీస్‌, డైరెక్టర్‌ జనరల్‌ ఆఫ్‌ జనరల్‌ ఆపరేషన్స్‌ - బ్రిగేడియర్‌ హుస్సేన్‌ అల్‌ హార్తి చెప్పారు.