ఫ్రాన్స్‌లోని రోవన్‌ నగరంలో ఓ చర్చిలోకి ఇద్దరు దుండగులు ప్రవేశించి బీభత్సం సృష్టించారు. సాయుధులైన దుండగులు కొద్దిసేపు సెయింట్‌ ఎటెన్నీ రోవరీ చర్చిలోని వారిని బందీలుగా చేసుకున్నారు. బందీల్లో ఒకరైన చర్చి ఫాదర్‌ను పదునైన ఆయుధంతో గొంతు కోసి చంపినట్లు ఫ్రెంచ్‌ మీడియా వెల్లడించింది. ఇద్దరు దుండగులను హతమార్చినట్లు పోలీసులు తెలిపారు. పోలీసులు, ఎమర్జెన్సీ సర్వీసుల సిబ్బంది హుటాహుటిన ఘటనా స్థలికి చేరుకుని సహాయక చర్యలు చేపట్టారు. చర్చిలోపల కాల్పుల శబ్దాలు కూడా వినిపించాయని ఫ్రెంచ్‌ టీవీ తెలిపింది.
ఫ్రాన్స్‌ అధ్యక్షుడు ఫ్రాంకోయిస్‌ హోలన్‌, అంతర్గత శాఖ మంత్రి బెర్నాండ్‌ కేజెనువె ఘటన స్థలానికి చేరుకుని పరిస్థితిని పరిశీలించనున్నారు. పోలీసులు చర్చి సమీంలోని రోడ్లను పూర్తిగా బ్లాక్‌ చేశారు. ప్రజలను అటువైపు రావొద్దని సూచించారు. గాయపడిన వారిని ఆస్పత్రికి తరలించి చికిత్స అందిస్తున్నారు. ఘటనకు గల కారణాలు తెలియరాలేదు. పోలీసులు దర్యాప్తు చేస్తున్నారు.