రియాద్: సౌదీ అరేబియాలో విస్తారంగా వర్షాలు కురుస్తున్నాయి. మక్కా, మదీనా, ఖాసిమ్, రియాద్, తూర్పు ప్రావిన్స్ మరియు ఉత్తర సరిహద్దు ప్రాంతాలలో వడగళ్ళు,  బలమైన గాలులతో కూడిన వర్షాల కారణంగా ఆకస్మిక వరదలు సంభవించే అవకాశం ఉందని నేషనల్ సెంటర్ ఫర్ మెటియరాలజీ (NCM) తెలిపింది.

అలాగే, తబుక్ మరియు అల్-జౌఫ్ ప్రాంతాలలోని కొన్ని ప్రాంతాలలో, అలాగే రాజ్యంలోని నైరుతి ఎత్తైన ప్రాంతాలలో తేలికపాటి నుండి మితమైన వర్షాలు కురుస్తాయని వెల్లడించింది. ఈ ప్రాంతాలలో పొగమంచు ఏర్పడే అవకాశం ఉందని, వాహనదారులు జాగ్రత్తగా ఉండాలని సూచించింది. 

రెడ్ సీ మీదుగా గంటకు 18-40 కి.మీ వేగంతో ఉపరితల గాలులు వీస్తున్నాయని తెలిపింది. అదే సమయంలో అరేబియా గల్ఫ్ మీదుగా ఉపరితల గాలులు గంటకు 10-35 కి.మీ వేగంతో వీస్తాయని పేర్కొంది. వీటి కారణంగా అలల ఎత్తు అర మీటర్ నుండి ఒకటిన్నర మీటర్ల వరకు ఉంటుందని, కొన్ని సమయాల్లో రెండున్నర మీటర్లకు పైగా ఉంటుందని హెచ్చరించింది. తీర ప్రాంతాల్లో ఉండే వారు జాగ్రత్తగా ఉండాలని, అధికారుల సూచనలను ఫాలో కావాలని కోరారు.