జాతీయ రహదారులపై దిచక్ర వాహనాలు నడిపే వారు ఇకనుంచి తప్పనిసరిగా హెల్మెట్‌ ధరించాల్సిందే. లేకపోతే జరిమానాతో పాటు పోలీసు కేసులను కూడా ఎదుర్కోవాల్సి ఉంటుంది. ఈ మేరకు గురువారం నుంచి హైవేలపై స్పెషల్‌ డ్రైవ్‌ ప్రారంభిస్తున్నట్లు అర్బన్‌ ఎస్పీ త్రిపాఠి బుధవారం తెలిపారు. ద్విచక్ర వాహన చోదకులు తప్పని సరిగా హెల్మెట్‌ ధరించాలన్నారు. తనిఖీ సందర్భంగా హెల్మెట్‌ లేకుండా పట్టుపడితే పెద్ద మొత్తంలో జరిమానాతో పాటు కేసులు కూడా నమోదు చేస్తామని హెచ్చరించారు. జాతీయ రహదారులపై ప్రమాదాలను దృష్టిలో ఉంచుకుని హెల్మెట్‌ తప్పనిసరి చేశామన్నారు. ప్రమాదాల్లో తలకు గాయాలై మృత్యువాత పడుతున్న వారి సంఖ్య ఎక్కువగా ఉందన్నారు. శరీరంలో తలభాగం ఎంతో ముఖ్యమైనదని, దీనిని దృష్టిలో ఉంచుకుని ద్విచక్ర వాహన చోదకులు తప్పని సరిగా హెల్మెట్‌ను ధరించాలని సూచించారు.