కువైట్: కువైట్ లో ప్రభుత్వ మరియు ప్రైవేట్ ఆరోగ్య రంగాలలోని ఉద్యోగులు, ఆరోగ్య సంరక్షణ నిపుణులకు కొత్త యూనిఫైడ్ డ్రెస్ ను రూపొందించారు. అధికారిక మరియు వృత్తిపరమైన దుస్తులను ప్రామాణీకరించడానికి కొత్త నిబంధనలను ఆమోదిస్తూ ఆరోగ్య మంత్రి డాక్టర్ అహ్మద్ అల్-అవధి ఉత్తర్వులు జారీ చేశారు.

నిబంధనల ప్రకారం, దుస్తులు పని స్వభావానికి తగినవిగా ఉండాలి. శుభ్రంగా, చక్కగా, నిరాడంబరంగా మరియు ప్రజల అభిరుచికి అనుగుణంగా ఉండాలి. షార్ట్స్, క్రీడా దుస్తులు, మోకాలి పైన బట్టలు, చిరిగిన లేదా రంధ్రాలు ఉన్న దుస్తులు లేదా అనుచిత నినాదాలు లేదా ప్రకటనలను కలిగి ఉన్న దుస్తులు ధరించడం నిషేధించారు. రోగికి ప్రత్యక్ష సంరక్షణ అందించే ఆరోగ్య సంరక్షణ నిపుణులకు, డిష్‌డాషాలు లేదా జీన్స్ ధరించడం నిషేధించారు.  గోళ్లను చిన్నగా మరియు శుభ్రంగా పెట్టాలి. క్లినికల్ మరియు పేషెంట్-కేర్ ప్రాంతాలలో కృత్రిమ గోర్లు అనుమతించబడవని అధికారులు తెలిపారు.