మేనేజర్ నైపుణ్యం పై ఫిర్యాదు చేయవచ్చా?

- January 28, 2026 , by Maagulf

దుబాయ్: ఆఫీసులో పని ఒత్తిడి కంటే, సరిగ్గా పని తెలియని మేనేజర్ కింద పని చేయడం ఒక్కోసారి పెద్ద తలనొప్పిగా మారుతుంది. ఇటీవల దుబాయ్కు చెందిన ఓ ఉద్యోగి తన గోడును వెళ్లబోసుకున్నాడు— "నా మేనేజర్కు అసలు మేనేజింగ్ స్కిల్స్ లేవు, దీనివల్ల టీమ్ మొత్తం ఇబ్బంది పడుతోంది. మేనేజ్మెంట్కు చెబితే పట్టించుకోవడం లేదు. ఇప్పుడు దీనిపై చట్టపరంగా ఫిర్యాదు చేయొచ్చా?" అని ప్రశ్నించాడు.

దీనిపై యూఏఈ ఉపాధి చట్టం (UAE Employment Law) ఏం చెబుతుందో ఇక్కడ చూద్దాం.

పని చేతకాకపోవడం నేరం కాదు.. కానీ!

యూఏఈ చట్టాల ప్రకారం, కేవలం ఒక మేనేజర్కు నైపుణ్యం లేదని లేదా ఆయనకు లీడర్షిప్ క్వాలిటీస్ లేవని కోర్టులో లేదా కార్మిక శాఖలో (MoHRE) ఫిర్యాదు చేయడానికి ప్రత్యేకమైన చట్టం ఏదీ లేదు. ఎవరిని మేనేజర్గా నియమించుకోవాలి అనేది పూర్తిగా కంపెనీ ఇష్టం.

కానీ, ఆ మేనేజర్ ప్రవర్తన వల్ల మీ హక్కులకు భంగం కలిగితే మాత్రం మీరు కచ్చితంగా ఫిర్యాదు చేయవచ్చు.

ఎప్పుడు ఫిర్యాదు చేయవచ్చు?

యూఏఈ ఉపాధి చట్టం (ఫెడరల్ డిక్రీ లా నం. 33/2021) ప్రకారం ఈ క్రింది పరిస్థితుల్లో మీరు గళం విప్పవచ్చు:

1. వేధింపులు (Harassment): మేనేజర్ మిమ్మల్ని మానసికంగా, శారీరకంగా లేదా మాటలతో వేధించినా, బుల్లీయింగ్కు (Bullying) పాల్పడినా చట్టం ప్రకారం అది నేరం (ఆర్టికల్ 14(2)).

2. అధికార దుర్వినియోగం: తన పొజిషన్ను అడ్డుపెట్టుకుని మిమ్మల్ని ఇబ్బంది పెడుతున్నా..

3. వివక్ష (Discrimination): మతం, జాతి లేదా రంగు ఆధారంగా వివక్ష చూపిస్తున్నా..

4. అసురక్షిత వాతావరణం: ఉద్యోగికి సురక్షితమైన పని వాతావరణం కల్పించాల్సిన బాధ్యత కంపెనీది (ఆర్టికల్ 13(13)). మేనేజర్ వల్ల ఆ వాతావరణం దెబ్బతింటే ఫిర్యాదు చేయొచ్చు.

మీరు తీసుకోవాల్సిన చర్యలు:

• అంతర్గత ఫిర్యాదు (Internal Grievance): ముందుగా మీ కంపెనీలోని HR విభాగంలో లేదా 'విజిల్ బ్లోయింగ్' (Whistleblowing) మెకానిజం ద్వారా అధికారికంగా ఫిర్యాదు చేయండి.

• ఆధారాలు సేకరించండి: మేనేజర్ ప్రవర్తన చట్టవిరుద్ధంగా ఉంటే (ఉదాహరణకు తిట్టడం లేదా వేధించడం), దానికి సంబంధించిన ఆధారాలను ఉంచుకోండి.

• MoHRE సంప్రదించండి: కంపెనీలో సమస్య పరిష్కారం కాకపోతే, మరియు ఆ మేనేజర్ చట్టాన్ని ఉల్లంఘిస్తున్నాడని మీకు అనిపిస్తే.. నేరుగా మానవ వనరుల మరియు స్వదేశీకరణ మంత్రిత్వ శాఖను (MoHRE) సంప్రదించవచ్చు.

గుర్తుంచుకోండి, మేనేజర్కు 'పని రాకపోవడం' అనేది కంపెనీ అంతర్గత సమస్య. కానీ ఆయన ప్రవర్తన వల్ల 'మీకు ఇబ్బంది కలగడం' అనేది చట్టపరమైన సమస్య. కాబట్టి ఆ రెండింటి మధ్య తేడాను గమనించి ముందడుగు వేయండి.

--బాజీ షేక్(యూఏఈ)