ఆధునిక యుగంలో విద్యా వ్యవస్థను మరింత ప్రభావవంతంగా మార్చేందుకు రిలయన్స్ జియో కీలక అడుగు వేసింది. గూగుల్ జెమిని ప్రో ఆధారిత ఆచరణాత్మక అప్లికేషన్ల ద్వారా అభ్యాసం, బోధన పద్ధతులను మెరుగుపరచడమే ఈ చొరవ ప్రధాన లక్ష్యం. తరగతి గదుల్లో అత్యాధునిక AI సాధనాలను ప్రవేశపెట్టడం ద్వారా డిజిటల్ నైపుణ్యాలు కలిగిన విద్యార్థులు, ఉపాధ్యాయులను తయారు చేయాలని జియో భావిస్తోంది.

విద్యారంగంలో ఆర్టిఫిషియల్ ఇంటెలిజెన్స్ నైపుణ్యాలను అందించడం ద్వారా డిజిటల్ డివైడ్‌ను తగ్గించేందుకు రిలయన్స్ జియో తెలంగాణ, ఆంధ్రప్రదేశ్ రాష్ట్రాల్లో విస్తృత విద్యా ప్రచారాన్ని ప్రారంభించింది. సాంకేతికతతో కూడిన వృత్తిపరమైన ప్రపంచంలో పోటీపడగల సామర్థ్యం విద్యార్థులకు కల్పించడమే ఈ కార్యక్రమం ఉద్దేశ్యం.

ఈ AI విద్యా ప్రచారం ఇప్పటికే విశేష విజయాన్ని సాధించింది. రెండు రాష్ట్రాల్లో కలిపి 2200కుపైగా పాఠశాలలకు చేరుకుని, 27,000 మందికి పైగా ఉపాధ్యాయులు, విద్యార్థులను భాగస్వాముల్ని చేసింది. ఆంధ్రప్రదేశ్‌లో 1500కుపైగా పాఠశాలల్లో సుమారు 20,000 మంది, తెలంగాణలో 700 పాఠశాలల్లో 7,000 మందికి పైగా ఈ శిక్షణ పొందుతున్నారు.

జియో సీనియర్ ఎగ్జిక్యూటివ్‌ల ఆధ్వర్యంలో నిర్వహిస్తున్న ఈ ఇంటరాక్టివ్ వర్క్‌షాప్‌లు గూగుల్ జెమిని వ్యవస్థను ప్రాయోగికంగా పరిచయం చేస్తున్నాయి. పాఠ్య నోట్స్ తయారీ, అసైన్‌మెంట్ల రచన, క్లిష్టమైన కోడింగ్ ప్రాజెక్టులకు సహాయం పొందడం వంటి అంశాలను సులభంగా చేయడంలో AI ఎలా ఉపయోగపడుతుందో శిక్షణలో వివరించారు. విద్యతో పాటు దీర్ఘకాలిక కెరీర్ వృద్ధిని దృష్టిలో పెట్టుకుని, ప్రాజెక్ట్ ఐడియేషన్, గ్రాఫిక్ డిజైన్, ఇంటర్వ్యూ ప్రిపరేషన్ వంటి అంశాల్లో AIని ఎలా వినియోగించుకోవాలో కూడా ఈ శిక్షణలో ప్రాధాన్యత ఇస్తున్నారు.