యూఏఈ: యూఏఈలో విమానయాన రంగం నెమ్మదిగా సాధారణ స్థితికి చేరుకుంటోంది. యూఏఈ బేస్డ్ విమానయాన సంస్థలు పరిమిత షెడ్యూల్ కార్యకలాపాలను ప్రకటించాయి. ప్రాంతీయంగా కొనసాగుతున్న సైనిక సంఘర్షణల మధ్య వైమానిక పరిమితుల కారణంగా దుబాయ్ ప్రధాన క్యారియర్ ఎమిరేట్స్ దాదాపు 100 కంటే ఎక్కువ ఫ్లైట్ షెడ్యూల్ ను ప్రకటించింది.

మార్చి 5 మరియు 6 తేదీల్లో దుబాయ్ నుండి 100 కి పైగా విమానాలు బయలుదేరి తిరిగి వస్తాయని ఎయిర్‌లైన్ తెలిపింది. అయితే, ప్రయాణికులు ధృవీకరించిన బుకింగ్ కలిగి ఉంటేనే విమానాశ్రయానికి వెళ్లాలని ఎయిర్‌లైన్ పునరుద్ఘాటించింది. ఫిబ్రవరి 28 మరియు మార్చి 31 మధ్య ప్రయాణించడానికి బుక్ చేసుకున్న ప్రయాణీకులు ఏప్రిల్ 30న లేదా అంతకు ముందు ప్రయాణం కోసం ప్రత్యామ్నాయ విమానంలో తిరిగి బుక్ చేసుకోవచ్చు అని ఎమిరేట్స్ తెలిపింది.

యూఎస్- ఇజ్రాయెల్ మరియు ఇరాన్‌లతో యుద్ధం  ప్రారంభమైన తర్వాత యూఏఈ మరియు ఇతర గల్ఫ్ దేశాలు తమ వైమానిక ప్రాంతాన్ని మూసివేసిన సంగతి తెలిసిందే. దీంతో వేలాది మంది ప్రయాణికులు గల్ఫ్ దేశాల్లో చిక్కుకుపోయారు.  ఇక దుబాయ్ రెండవ క్యారియర్ ఫ్లైదుబాయ్ కూడా దాని నెట్‌వర్క్‌లో తక్కువ షెడ్యూల్‌తో కార్యకలాపాలను తిరిగి ప్రారంభించింది.

ఫ్లైదుబాయ్ నెట్‌వర్క్‌లో దుబాయ్ ద్వారా కనెక్ట్ అయ్యే ప్రయాణీకులు కనెక్టింగ్ ఫ్లైట్ పనిచేస్తుంటే మాత్రమే వారిని ప్రయాణించడానికి అనుమతిస్తామని ఎయిర్‌లైన్ తెలిపింది.

అబుదాబిలోని జాయెద్ అంతర్జాతీయ విమానాశ్రయం (AUH) కూడా అబుదాబి సమన్వయంతో పరిమిత సంఖ్యలో విమాన కార్యకలాపాలను తిరిగి ప్రారంభించింది.  షార్జాకు చెందిన ఎయిర్ అరేబియా విమానాలు కూడా మార్చి 9న మధ్యాహ్నం 3 గంటల వరకు తాత్కాలికంగా నిలిపివేశారు.