రియాద్ః జనరల్ అథారిటీ ఫర్ స్టాటిస్టిక్స్ (GASTAT) డేటా ప్రకారం, సౌదీ అరేబియా  చమురుయేతర ఎగుమతులు గతేడాదితో పోలిస్తే జనవరిలో 22.1% పెరిగాయి. దిగుమతులతో పోలిస్తే ఎగుమతుల పనితీరు బలంగా ఉందని తెలిపింది. దిగుమతులతో పోలిస్తే చమురుయేతర ఎగుమతుల నిష్పత్తి గతేడాది 34.9% నుండి 40%కి పెరిగింది.
యంత్రాలు, విద్యుత్ పరికరాలు మరియు విడిభాగాలు ఈ వృద్ధిలో కీలక భూమిక పోషించాయి.  ఈ రంగంలో ఎగుమతులు గతేడాదితో పోలిస్తే 77.5% పెరిగాయి. ఈ ఉత్పత్తులే తిరిగి ఎగుమతులలో కూడా ఆధిపత్యం వహించాయి. మొత్తం ఎగుమతులలో 46.1% వాటాను కలిగి ఉన్నాయి. గత సంవత్సరం ఇదే కాలంతో పోలిస్తే దిగుమతులు 6.5% నెమ్మది వేగంతో పెరగగా, వస్తు వాణిజ్య మిగులు 17.5% తగ్గింది.
జనవరి నాటికి సౌదీ ఎగుమతులకు చైనా అగ్ర గమ్యస్థానంగా నిలిచింది. ఇది మొత్తం ఎగుమతులలో 15.1% వాటాను కలిగి ఉంది. ఆ తర్వాత యునైటెడ్ అరబ్ ఎమిరేట్స్ 12.9%, భారత్ 9.8% వాటాతో ఉన్నాయి. ఈ టాప్ 10 దేశాలు మొత్తం ఎగుమతులలో 68.6% వాటాను కలిగి ఉన్నాయి.
చమురుయేతర ఎగుమతులకు కింగ్ అబ్దుల్ అజీజ్ అంతర్జాతీయ విమానాశ్రయం 19.2% వాటాతో అగ్రగామిగా నిలిచింది. దాని తర్వాత జెడ్డా ఇస్లామిక్ సీపోర్ట్ (11.1%), జుబేల్‌లోని కింగ్ ఫహద్ ఇండస్ట్రియల్ సీపోర్ట్ (9.3%), రియాద్‌లోని కింగ్ ఖాలిద్ అంతర్జాతీయ విమానాశ్రయం (9.2%),  జుబేల్ పోర్ట్ (8.2%) ఉన్నాయి. ఈ ఐదు కలిసి మొత్తం చమురుయేతర ఎగుమతులలో 56.9% వాటాను నిర్వహించాయని అథారిటీ డేటా తెలిపింది.