సౌదీ అరేబియాలో ఉద్యోగం కోల్పోయి అవస్థలు పడుతున్న కేరళీయుల పరిస్థితిని తెలుసుకోవడానికి ఆ రాష్ట్ర ప్రభుత్వం మంత్రి కేటీ జలీల్‌ను సౌదీ పంపనుంది. రాష్ట్ర మంత్రివర్గం బుధవారం జరిగిన సమావేశంలో మంత్రి జలీల్‌ను, ప్రత్యేక కార్యదర్శి వీకే బేబీని సౌదీ పంపనున్నట్లు అధికారికంగా వెల్లడించింది. ఇప్పటివరకు అందిన సమాచారం ప్రకారం 200 మంది కేరళీయులు లేబర్‌ క్యాంపుల్లో పని చేస్తున్నారన్నారు. ఇప్పుడు వారు ఉద్యోగం కోల్పోయి తినడానికి కూడా ఏమి లేని పరిస్థితి ఏర్పడిందన్నారు. వారి సమస్యలను నేరుగా తెలుసుకునేందుకే అక్కడికి వెళ్తున్నట్లు జలీల్‌ తెలిపారు. .
సౌదీలో చమురు ధరలు తగ్గడం వల్ల వ్యాపారం నష్టాల్లో కూరుకు పోవడంతో అక్కడి సంస్థలు కార్మికులకు సరిగా వేతనాలు ఇవ్వడం లేదు. దాదాపు 10వేల మంది భారతీయులు నిరుద్యోగులుగా మారారు.