ఐపీఎల్ 2026 సీజన్ నుంచి క్రికెట్ బోర్డు (BCCI) నిబంధనలను మరింత కఠినతరం చేసింది. ముఖ్యంగా మ్యాచ్ జరుగుతున్న సమయంలో బెంచ్ ఆటగాళ్లు మరియు సపోర్ట్ స్టాఫ్ ప్రవర్తనపై కొత్త మార్గదర్శకాలను జారీ చేసింది. బీసీసీఐ తాజా ఆదేశాల ప్రకారం, మ్యాచ్ జరుగుతున్న సమయంలో టీమ్ షీట్‌లో నమోదైన 16 మందికి (ప్లేయింగ్ ఎలెవన్ + 5 మంది సబ్‌స్టిట్యూట్లు) మాత్రమే గ్రౌండ్ పరిసరాల్లోకి అనుమతి ఉంటుంది. మిగిలిన ఆటగాళ్లు డ్రెస్సింగ్ రూమ్‌కే పరిమితం కావాలి. గతంలో బెంచ్ ప్లేయర్లు బౌండరీ లైన్ వద్ద కూర్చోవడం లేదా తిరగడం చేసేవారు, కానీ ఇకపై బౌండరీ చుట్టూ ఐదుగురి కంటే ఎక్కువ మంది సబ్‌స్టిట్యూట్లు ఉండకూడదని స్పష్టం చేశారు. వీరు ఆటగాళ్లకు డ్రింక్స్, బ్యాట్స్ లేదా మెసేజ్‌లు తీసుకురావడం వంటి పనులను కూడా కేటాయించిన పద్ధతిలోనే చేయాల్సి ఉంటుంది.

మైదానంలో ఉండే ఎల్‌ఈడీ (LED) అడ్వర్టైజింగ్ బోర్డుల వద్ద ఆటగాళ్లు కూర్చోవడాన్ని లేదా నిలబడటాన్ని బీసీసీఐ నిషేధించింది. వార్మప్ సమయంలో లేదా ప్రాక్టీస్ సమయంలో ఈ ఖరీదైన బోర్డులు దెబ్బతినకుండా ఉండేందుకు ఈ నిర్ణయం తీసుకున్నారు. బౌండరీ లైన్ మరియు యాడ్ బోర్డుల మధ్య తిరగడంపై కూడా ఆంక్షలు విధించారు. సబ్‌స్టిట్యూట్ ప్లేయర్లు కూర్చోవడానికి ఫ్రాంచైజీలు ప్రత్యేకంగా కేటాయించిన ప్రదేశాల్లోనే ఉండాలని, నిబంధనలు ఉల్లంఘిస్తే జరిమానాలు తప్పవని హెచ్చరించింది.

కేవలం గ్రౌండ్ లోపలే కాకుండా, మ్యాచ్‌కు ముందు మరియు తర్వాత కూడా కొత్త నియమాలు అమల్లోకి వచ్చాయి. ఆటగాళ్లు తప్పనిసరిగా టీమ్ బస్సులోనే ప్రయాణించాలని, వ్యక్తిగత వాహనాలను అనుమతించబోమని బోర్డు తెలిపింది. మ్యాచ్ ప్రజెంటేషన్ సమయంలో స్లీవ్‌లెస్ జెర్సీలు లేదా ఫ్లాపీ హ్యాట్స్ ధరించకూడదని, కేవలం నిర్ణీత డ్రెస్ కోడ్ పాటించాలని పేర్కొంది. అలాగే, ఆరెంజ్ క్యాప్ మరియు పర్పుల్ క్యాప్ హోల్డర్లు మ్యాచ్ జరుగుతున్నప్పుడు తప్పనిసరిగా ఆ క్యాప్‌లను ధరించాలని, బ్రాడ్‌కాస్టింగ్ విజువల్స్‌లో అవి స్పష్టంగా కనిపించాలని ఆదేశించింది. ఈ మార్పుల ద్వారా ఐపీఎల్‌ను మరింత క్రమశిక్షణతో కూడిన గ్లోబల్ టోర్నమెంట్‌గా తీర్చిదిద్దాలని బీసీసీఐ లక్ష్యంగా పెట్టుకుంది.