బీజింగ్: అబుదాబి క్రౌన్ ప్రిన్స్ షేక్ ఖాలెద్ బిన్ మహ్మద్ బిన్ జాయెద్ అల్ నహ్యాన్ అధికారిక పర్యటన నిమిత్తం చైనా రాజధాని బీజింగ్‌కు చేరుకున్నారు. యూఏఈ–చైనా ద్వైపాక్షిక సంబంధాలను మరింత బలోపేతం చేయడం, కీలక రంగాల్లో సహకారాన్ని విస్తరించడం ఈ పర్యటన ప్రధాన లక్ష్యంగా అధికార వర్గాలు వెల్లడించాయి.

ఈ పర్యటన ద్వారా యూఏఈ మరియు చైనా మధ్య ఉన్న సమగ్ర వ్యూహాత్మక భాగస్వామ్యం మరింత బలపడనుంది. అభివృద్ధి, ఆర్థిక సహకారం, పెట్టుబడుల విస్తరణకు కొత్త అవకాశాలను అన్వేషించడంపై ఇరు దేశాలు దృష్టి సారిస్తున్నాయి. ప్రాంతీయ, అంతర్జాతీయ మార్కెట్ పరిణామాలకు అనుగుణంగా అధిక అవకాశాలున్న రంగాల్లో పెట్టుబడులను పెంచే దిశగా చర్చలు జరగనున్నాయి.

అలాగే ప్రపంచ వాణిజ్య కేంద్రంగా, కీలక పెట్టుబడి గేట్వేగా, సుస్థిర ఆర్థిక వృద్ధికి వ్యూహాత్మక భాగస్వామిగా యూఏఈ స్థాయిని మరింత బలపరిచే దిశగా ఈ పర్యటన ప్రాధాన్యత సంతరించుకుంది.

షేక్ ఖాలెద్ వెంట ఉన్నత స్థాయి ప్రతినిధి బృందం కూడా చైనాకు వెళ్లింది. ఈ బృందంలో షేక్ జాయెద్ బిన్ మహ్మద్ బిన్ జాయెద్, యూఏఈ అధ్యక్షుడి చైనా ప్రత్యేక దూత ఖల్దూన్ ఖలీఫా అల్ ముబారక్, పరిశ్రమలు మరియు ఆధునిక సాంకేతిక శాఖ మంత్రి డాక్టర్ సుల్తాన్ అహ్మద్ అల్ జాబెర్, పెట్టుబడి మంత్రి మొహమ్మద్ హసన్ అల్ సువైది, విదేశీ వాణిజ్య మంత్రి డాక్టర్ థాని అల్ జేయూది సహా పలువురు మంత్రులు, ఉన్నతాధికారులు ఉన్నారు.

ఈ పర్యటన యూఏఈ–చైనా సంబంధాల్లో కొత్త అధ్యాయానికి నాంది పలకనుందని, ముఖ్యంగా వాణిజ్యం, పెట్టుబడులు, సాంకేతికత, ఇంధనం, మౌలిక సదుపాయాల రంగాల్లో కీలక ఒప్పందాలకు మార్గం సుగమం కానుందని విశ్లేషకులు భావిస్తున్నారు.