బెంగళూరు: కర్ణాటకలో సంచలనం సృష్టించిన రూ.102 కోట్ల గోల్డ్ స్మగ్లింగ్ కేసులో నటి రన్యా రావుకు కోర్టు ఊరట కల్పించింది. గత ఏడాది నుంచి బెంగళూరులోని పరప్పణ అగ్రహారం జైలులో రిమాండ్‌లో ఉన్న ఆమెకు బుధవారం బెయిల్ మంజూరైంది.

ఈ కేసులో అంతర్జాతీయ స్మగ్లింగ్ ముఠాలతో సంబంధాలు ఉన్నాయనే ఆరోపణలతో కస్టమ్స్ మరియు డిపార్ట్‌మెంట్ ఆఫ్ రెవెన్యూ ఇంటెలిజెన్స్ (DRI) అధికారులు గత ఏడాది ఆమెను అరెస్ట్ చేశారు. అప్పటి నుంచి ఆమె జైలులోనే ఉన్నారు.

వాస్తవానికి రన్యా రావుకు 2025 మే నెలలోనే సాధారణ బెయిల్ లభించింది. అయితే స్మగ్లింగ్ నిరోధక చట్టాల కింద నమోదైన కేసుల కారణంగా ఆమె విడుదల కాలేకపోయారు. విదేశీ మారకద్రవ్య నిబంధనల ఉల్లంఘన ఆరోపణలు కూడా ఆమెపై నమోదయ్యాయి.

ఇప్పుడు ఆ చట్టంలోని కొన్ని కఠిన నిబంధనల నుంచి న్యాయపరమైన వెసులుబాటు లభించడంతో కోర్టు తాజాగా బెయిల్ మంజూరు చేసింది. దీంతో ఏడాది తర్వాత ఆమె జైలు నుంచి బయటకు రానున్నారు.

ఒకప్పుడు హీరోయిన్‌గా మంచి గుర్తింపు పొందిన రన్యా రావు ఈ భారీ స్మగ్లింగ్ కేసులో ఇరుక్కోవడం సినీ వర్గాల్లో చర్చనీయాంశమైంది. ఆమె విడుదల అనంతరం ఈ కేసుపై ఏమి చెబుతారో అన్న ఆసక్తి నెలకొంది.