యూఏఈ: దుబాయ్, షార్జా, బహ్రెయిన్ పోలీసులు నెల రోజుల పాటు సంయుక్తంగా నిర్వహించిన ఆపరేషన్‌లో భారీ డ్రగ్ నెట్ వర్క్ ను ఛేదించారు. మొత్తం 13 మంది సభ్యుల డ్రగ్స్ స్మగ్లింగ్ ముఠాను అరెస్టు చేసినట్లు యూఏఈ జాతీయ మాదకద్రవ్యాల నిరోధక అథారిటీ ప్రకటించింది. ఒక ఆసియా డ్రగ్ డీలర్ ఈ ముఠాను నడిపిస్తున్నట్లు, అతను యూఏఈ అంతటా మాదకద్రవ్యాల పంపిణీకి సభ్యులను నియమించుకున్నట్లు ఆరోపణలు ఉన్నాయి.

జాతీయ మాదకద్రవ్యాల నిరోధక సంస్థ ప్రకారం, ఈ దాడుల సందర్భంగా 56,623 కిలోల మాదకద్రవ్యాలతో పాటు 8,159 సైకోట్రోపిక్ మాత్రలు మరియు హషీష్ ఆయిల్‌తో నింపిన పెద్ద మొత్తంలో ఎలక్ట్రానిక్ సిగరెట్లను స్వాధీనం చేసుకున్నారు. స్వాధీనం చేసుకున్న మాదకద్రవ్యాల మొత్తం విలువ సుమారు 3.3 మిలియన్ దిర్హమ్స్‌ గా తెలిపారు.  

బహ్రెయిన్‌లోని భద్రతా సంస్థలతో కలిసి దేశం వెలుపల ఉన్న ముఠా నాయకుడిని అరెస్టు చేసి యూఏఈకి అప్పగించారు.  మాదకద్రవ్యాల అక్రమ రవాణా మూలాలను అరికట్టడానికి రూపొందించిన జాతీయ వ్యూహంలో భాగంగానే ఈ ఆపరేషన్ జరిగిందని అథారిటీ తెలిపింది.  

యూఏఈ వెలుపల నుండి నేరపూరిత నెట్‌వర్క్‌లను నడుపుతున్న మాదకద్రవ్యాల స్మగ్లర్లపై చర్యలు తీసుకోవడానికి తమ వద్ద చట్టాలు మరియు వనరులు ఉన్నాయని జాతీయ మాదకద్రవ్యాల నిరోధక అథారిటీ తెలిపింది.