అమెరికా విధిస్తున్న ఆంక్షలు, మరోవైపు హర్మూజ్ జలసంధిపై పట్టు కోసం ఇరాన్ చేస్తున్న ప్రయత్నాలు అంతర్జాతీయంగా ఆందోళన కలిగిస్తున్నాయి. ఇన్‌స్టిట్యూట్ ఫర్ ది స్టడీ ఆఫ్ వార్ (ISW) తాజా నివేదిక ప్రకారం ఈ వివాదం మరింత ముదిరేలా కనిపిస్తోంది. హర్మూజ్ జలసంధిని ప్రపంచ వాణిజ్యానికి కీలక మార్గంగా పరిగణిస్తారు. దీనిపై పూర్తి నియంత్రణ సాధించాలని ఇరాన్ భావిస్తోంది. ఇందుకు సంబంధించి ఇరాన్ ప్రధాన వ్యూహాలు ఇవే. ఈ మార్గం గుండా వెళ్లే వాణిజ్య నౌకల నుండి పన్నులు (Tolls) వసూలు చేసేందుకు ఇరాన్ ప్రణాళిక సిద్ధం చేస్తోంది. పొరుగు దేశమైన ఒమన్‌ను ఈ ప్రక్రియలో భాగస్వామిని చేయడం ద్వారా తన చర్యలకు అంతర్జాతీయ చట్టబద్ధత కల్పించుకోవాలని చూస్తోంది. అమెరికా తన ఓడరేవుల ముట్టడిని పూర్తిగా ఎత్తివేస్తేనే చర్చలకు వస్తామని ఇరాన్ ఖరాఖండిగా చెబుతోంది.

అమెరికా అధ్యక్షుడు డొనాల్డ్ ట్రంప్ ఇరాన్‌ విషయంలో ఏమాత్రం వెనక్కి తగ్గడం లేదు. అమెరికా నౌకాదళం చేస్తున్న ఓడరేవుల ముట్టడి ఇరాన్ ఆర్థిక మూలాలను దెబ్బతీస్తోంది. ఇది తమ వ్యూహాత్మక విజయమని ట్రంప్ భావిస్తున్నారు. అణు కార్యక్రమాన్ని పూర్తిగా నిలిపివేసే వరకు ఆంక్షలు తొలగించే ప్రసక్తే లేదని అమెరికా స్పష్టం చేస్తోంది. నేరుగా అమెరికాతో తలపడటమే కాకుండా, పరోక్షంగా (Proxy War) కూడా ఇరాన్ తన పంతాన్ని నెగ్గించుకోవాలని చూస్తోంది. యెమన్‌లోని హౌతీ మిలిటెంట్లను బాబ్ అల్ మందబ్ జలసంధిలో నౌకలపై దాడులకు ఉసిగొల్పడం ద్వారా ప్రపంచ దేశాలపై ఒత్తిడి పెంచేందుకు ప్రయత్నిస్తోంది. కాల్పుల విరమణ సమయాన్ని తన డ్రోన్లు క్షిపణి వ్యవస్థలను ఆధునీకరించుకోవడానికి ఇరాన్ వాడుకోవడం గమనార్హం. ప్రస్తుతం ఇరు దేశాల మధ్య నెలకొన్న “డెడ్ లాక్” (స్తంభన) యుద్ధానికి దారితీసేలా ఉంది. ఒకవేళ ఇరాన్ హర్మూజ్ జలసంధిని మూసివేసి వాణిజ్యానికి ఆటంకం కలిగిస్తే, అమెరికా మరోసారి భారీ స్థాయిలో సైనిక చర్యకు దిగే అవకాశముందని నిపుణులు హెచ్చరిస్తున్నారు.