కువైట్ సిటీ: కువైట్ అంతర్జాతీయ విమానాశ్రయంలోని టెర్మినల్-5 నుంచి జజీరా ఎయిర్‌వేస్ తన పూర్తిస్థాయి విమాన సేవలను ఈ ఆదివారం నుంచి తిరిగి ప్రారంభించనున్నట్లు ప్రకటించింది. ప్రతిరోజూ ఉదయం 6:00 గంటల నుంచి సాయంత్రం 6:00 గంటల వరకు సర్వీసులు అందుబాటులో ఉంటాయని అధికారులు తెలిపారు.

గత వారం నుంచి పాక్షికంగా విమాన సర్వీసులు ప్రారంభమైనప్పటికీ, ఈ ఆదివారం నుంచి పూర్తి స్థాయిలో కార్యకలాపాలు నిర్వహించనున్నట్లు ఎయిర్‌లైన్ సీఈఓ భరతన్ పశుపతి కువైట్ వార్తా సంస్థకు వెల్లడించారు.

టెర్మినల్-5 కార్యకలాపాలు పూర్తిగా అందుబాటులోకి రావడంతో, కువైట్ నుంచి నేరుగా 27 నగరాలకు జజీరా ఎయిర్‌వేస్ విమాన సర్వీసులను నడపనుంది.

ప్రయాణికులు విమాన సమయానికి కనీసం కొన్ని గంటల ముందుగానే జజీరా ఎయిర్‌వేస్ ‘పార్క్ అండ్ ఫ్లై’ (Park & Fly) టెర్మినల్‌కు చేరుకోవాలని అధికారులు సూచించారు. అక్కడ చెక్-ఇన్ మరియు బోర్డింగ్ ప్రక్రియలు పూర్తి చేసిన అనంతరం ప్రయాణికులను టెర్మినల్-5కు తరలిస్తామని వెల్లడించారు.

పూర్తిస్థాయి సేవల పునఃప్రారంభంతో ప్రయాణికులకు మరింత సౌకర్యవంతమైన సేవలు అందనున్నాయని జజీరా ఎయిర్‌వేస్ పేర్కొంది.