యూఏఈ: రాస్ అల్ ఖైమాలో ట్రెక్కింగ్ చేస్తుండగా తీవ్రమైన వడదెబ్బకు గురైన ఒక మహిళను యూఏఈ హైకింగ్ గైడ్ రక్షించాడు. ఏప్రిల్ 25న  హైకింగ్ వర్గాలలో 'ఫైసీ'గా పిలువబడే 43 ఏళ్ల పర్వతారోహణ శిక్షకుడు ఫైసల్ షల్మానీ..  రాస్ అల్ ఖైమాలోని రాస్ అల్ అషర్ గ్రామంలోని ప్రసిద్ధ 'స్టెయిర్‌వే టు హెవెన్' ట్రైల్‌లో 16 మంది హైకర్లకు నాయకత్వం వహిస్తుండగా, మరో బృందానికి సంబంధించిన అత్యవసర పరిస్థితి గురించి అతనికి సమాచారం అందింది.

గత 22 ఏళ్లుగా యూఏఈలో నివసిస్తున్న ఈ పాకిస్తానీ ప్రవాసి, తన హైకింగ్ బృందాన్ని తోటి గైడ్‌కు అప్పగించి, సంఘటనా స్థలానికి 15 నిమిషాల్లో చేరుకున్నాడు. అప్పటికే ఆ మహిళ పరిస్థితి బాగా క్షీణించింది.  

"ఆమెకు అప్పటికే మూర్ఛ వచ్చింది. మాటలు సరిగ్గా రావడం లేదు మరియు స్పృహ కోల్పోతోంది. " అని ఆ సంఘటనను గుర్తుచేసుకుంటూ ఫైసల్ చెప్పాడు. 15 సంవత్సరాలకు పైగా హైకింగ్ మరియు గైడింగ్ అనుభవం ఉన్న ఫైసల్..  వెంటనే అత్యవసర ప్రథమ చికిత్స విధానాలను ప్రారంభించి, ఆమె శరీర ఉష్ణోగ్రతను తగ్గించడంపై దృష్టి పెట్టినట్లు తెలిపాడు.

మూడు గంటల సుదీర్ఘ వాక్

దేశ సరిహద్దు ప్రాంతానికి సమీపంలో ఉన్న మారుమూల, కఠినమైన భూభాగం కారణంగా ఆమెను తరలించడం ఒక పెద్ద సవాలుగా మారిందని తెలిపాడు. గాలి లేదా భూమార్గ సహాయక చర్యలకు తక్షణ అవకాశం లేకపోవడంతో, ఫైసల్ స్వయంగా తరలింపు చేపట్టాలని నిర్ణయించుకున్నాడు. పాక్షిక స్పృహలో ఉన్న ఆ హైకర్‌ను తన వీపుపై ఎత్తుకుని, ఇరుకైన, మార్గాలను దాటి, వేచి ఉన్న అత్యవసర సేవల వద్దకు చేరుకోవడానికి అతను మూడు గంటల పాటు నడిచాడు. అప్పటికే సిద్ధంగా ఉన్న అంబులెన్స్, పోలీసు బృందాలు వెంటనే ఆమె సంరక్షణ బాధ్యతలు చేపట్టాయని వివరించాడు.  

దుబాయ్‌లోని ఒక ఆసుపత్రికి తరలించే ముందు, ఆమెకు మొదట రాస్ అల్ ఖైమాలో చికిత్స అందించారు. ఆమె పరిస్థితి నిలకడగా మారిన తర్వాత ఆసుపత్రి నుండి డిశ్చార్జ్ చేసినట్లు అధికారులు తెలిపారు.

తగినంత సన్నద్ధత లేకపోవడంతోనే..

AFT అడ్వెంచర్స్ వ్యవస్థాపకుడైన ఫైసల్  హైకర్లకు మరియు పర్వతారోహకులకు శిక్షణ ఇస్తారు. ఆయన టాంజానియాలోని కిలిమంజారో పర్వతాన్ని తొమ్మిది సార్లు మరియు రష్యాలోని ఎల్బ్రస్ పర్వతాన్ని ఐదు సార్లు అధిరోహించారు. సంవత్సరాలుగా అనేక పర్వతారోహణ యాత్రలలో పాల్గొనడంతోపాటు సహాయక చర్యలను ప్రత్యక్షంగా చూసిన ఆయన, చాలా అత్యవసర పరిస్థితులు రెండు సాధారణ కారణాల వల్ల తలెత్తుతాయని చెప్పారు.  తగినంత సన్నద్ధత లేకపోవడం మరియు దారిలోని పరిస్థితులను తక్కువగా అంచనా వేయడం అని పేర్కొన్నాడు.

"తగినంత నీరు తీసుకెళ్లడం, సరైన పరికరాలు ధరించడం లేదా అత్యవసర పరిస్థితిలో ఏమి చేయాలో తెలుసుకోవడం వంటి సాధారణ విషయాలు తరచుగా విస్మరిస్తారు." అని వివరించాడు. ముఖ్యంగా వేసవి కాలంలో చాలా మంది హైకర్లు వేడి, కఠినమైన భూభాగం మరియు శారీరక శ్రమ ప్రభావాన్ని తక్కువగా అంచనా వేస్తారని ఆయన తెలిపారు.

వేసవిలో హైకింగ్ వల్ల కలిగే ప్రమాదం

యూఏఈలో ఉష్ణోగ్రతలు వేగంగా పెరుగుతున్న నేపథ్యంలో హైకర్లు అదనపు జాగ్రత్తలు తీసుకోవాలని ఫైసల్ హెచ్చరించారు. “వాతావరణం చాలా త్వరగా మారిపోతుంది. ఒక రోజు వాతావరణం అనుకూలంగా ఉంటే, మరుసటి రోజే అధిక ఉష్ణోగ్రతలు ఉంటాయి. మార్చి నెల వర్షాల వల్ల వాతావరణం చల్లబడి కొంత ఉపశమనం లభించింది.  అయినప్పటికీ, ఉష్ణోగ్రత వేగంగా పెరగడంతో చాలా మంది హైకర్లు షాక్ కు గురవుతున్నారు.” అని తెలిపాడు.

బయటి ఉష్ణోగ్రతలు సాధారణ శరీర ఉష్ణోగ్రత (సుమారు 36-37°C) కంటే ఎక్కువగా ఉన్నప్పుడు హైకింగ్‌కు దూరంగా ఉండాలని ఆయన సలహా ఇచ్చారు. ఎందుకంటే అటువంటి పరిస్థితులలో శరీరం వేడిని నియంత్రించడానికి ఇబ్బంది పడుతుందన్నారు.

హైకింగ్ చేయాలనుకునే వారికి సూచనలు

ఉదయాన్నే (సూర్యోదయానికి ముందు నుండి ఉదయం 8-9 గంటల వరకు) లేదా సూర్యాస్తమయం తర్వాత ప్రారంభించడం

హైకింగ్ చేసే ప్రతి గంటకు కనీసం ఒక లీటరు నీటిని వెంట తీసుకువెళ్లడం

తేలికైన, గాలి ప్రసరించే దుస్తులు ధరించడం

తల తిరగడం, వికారం, అలసట లేదా దృష్టి మసకబారడం వంటి లక్షణాల కోసం గమనిస్తూ ఉండటం

ఫుజైరా మరియు రాస్ అల్ ఖైమా పర్యాటక శాఖల ప్రకారం.. లైసెన్స్ పొందిన గైడ్‌లతో బృందాలుగా హైకింగ్ చేయడం తప్పనిసరి.

వడదెబ్బ ఒక వైద్య అత్యవసర పరిస్థితి

అల్ ఫలాలోని బుర్జీల్ మెడికల్ సెంటర్‌లో ఇంటర్నల్ మెడిసిన్ కన్సల్టెంట్ అయిన డాక్టర్ మొహమ్మద్ ముస్తఫా ఎల్షీఖ్ ప్రకారం..  వడదెబ్బ అనేది తక్షణ జోక్యం అవసరమయ్యే ఒక వైద్య అత్యవసర పరిస్థితి. "మొదటి చర్యగా, ఆ వ్యక్తిని నీడ ఉన్న లేదా ఎయిర్ కండిషన్ ఉన్న ప్రదేశానికి తరలించి, శరీరాన్ని చల్లబరచడం ప్రారంభించాలి." అని ఆయన అన్నారు. అదనపు దుస్తులను తొలగించి, శరీర భాగాల్లో కోల్డ్ ప్యాక్‌లను పెట్టడం లేదా శరీరానికి చల్లటి నీటిని తుడుపుతూ తగినంత గాలి ప్రసరణ ఉండేలా చూసుకోవడం వంటి చల్లబరిచే చర్యలను ప్రారంభించాలి. వ్యక్తి స్పృహలో ఉంటే, చిన్న చిన్న గుక్కలతో నీటిని ఇవ్వవచ్చు. కానీ బలవంతంగా ద్రవపదార్థాలు తాగించవద్దని సూచించారు.

అత్యధిక వేడి కారణంగా ఎవరికైనా మూర్ఛ వస్తే, వారి భద్రతకు ప్రాధాన్యతనిచ్చి, వారి శ్వాస మార్గాంలో అడ్డంకులు లేకుండా చూడాలి. ఊపిరాడకుండా ఉండేందుకు వారిని మెల్లగా ఒక పక్కకు పడుకోబెట్టాలి. వారి కదలికలను నిరోధించవద్దు. వారి నోటిలో ఏమీ పెట్టవద్దని తెలిపారు. తల తిరగడం, తలనొప్పి లేదా వికారం వంటి లక్షణాలను ముందుగానే గుర్తించడం వల్ల ప్రాణాంతక పరిస్థితులకు దారితీయకుండా నివారించవచ్చని డాక్టర్ ఎల్షెఖ్ తెలిపారు.