అమరావతి: ప్రభుత్వం వైద్య సేవలను ప్రజలకు మరింత చేరువ చేసేందుకు ఆంధ్రప్రదేశ్ మెడికల్ కౌన్సిల్ (AMC) సేవలను ఇకపై ‘మనమిత్ర’ వాట్సాప్ బాట్ ద్వారా అందుబాటులోకి తెచ్చింది. దీనివల్ల వైద్యులు కార్యాలయాల చుట్టూ తిరగాల్సిన అవసరం లేకుండా, ప్రజలు ఆసుపత్రులకు వెళ్లకుండానే కీలక సమాచారాన్ని తమ మొబైల్ ఫోన్ ద్వారా పొందే వీలు కలిగింది.

వినియోగదారులు తమ మొబైల్ నుండి 9552300009 అనే వాట్సాప్ నంబర్‌కు “Hi” అని మెసేజ్ పంపడం ద్వారా ఈ సేవలను ప్రారంభించవచ్చు. సందేశం పంపిన తర్వాత వచ్చే మెనూలో ‘ఆరోగ్య శాఖ’ ఆప్షన్‌ను ఎంచుకోవడం ద్వారా వైద్యులు మరియు సామాన్య పౌరులు తమకు కావలసిన సమాచారాన్ని పొందవచ్చు. ఈ విధానం అత్యంత సులభంగా మరియు వేగంగా సేవలందించేలా రూపొందించబడింది.

AP health services: వైద్యులకు లభించే ప్రయోజనాలు

ఈ వాట్సాప్ సేవల ద్వారా వైద్యులు తమ వృత్తిపరమైన వివరాలను సులభంగా పర్యవేక్షించవచ్చు. ముఖ్యంగా:

• మెడికల్ రిజిస్ట్రేషన్ వివరాలు, దరఖాస్తుల ప్రస్తుత స్థితి (Status).
• రాబోయే కంటిన్యూయింగ్ మెడికల్ ఎడ్యుకేషన్ కార్యక్రమాల షెడ్యూల్.
• తమ ఖాతాలోని క్రెడిట్ పాయింట్ల సమాచారాన్ని తక్షణమే తెలుసుకునే సదుపాయం ఉంటుంది.

సామాన్య ప్రజలకు మేలు
ప్రభుత్వ ఆసుపత్రులకు వెళ్లే రోగులకు ఈ సేవలు ఎంతో ఉపయోగకరంగా మారనున్నాయి. ఆసుపత్రుల్లో ఓపీ (OP) సేవలు, బ్లడ్ బ్యాంక్ లలో రక్త నిల్వలు, మందుల లభ్యత, శస్త్రచికిత్స సామగ్రికి సంబంధించిన వివరాలను ముందుగానే తెలుసుకోవచ్చు. దీనివల్ల అత్యవసర సమయాల్లో రోగులకు సమయం ఆదా అవ్వడమే కాకుండా, పారదర్శకత పెరుగుతుందని ప్రభుత్వం భావిస్తోంది.