యూఏఈ: యూఏఈ నివాసితులు ఇప్పుడు ఖోర్ అల్ మమ్జర్ బీచ్ లో ఎంజాయ్ చేయవచ్చు. దీనిని ప్రజల కోసం ప్రారంభించారు. ఇందులో కొత్త సౌకర్యాలలో భాగంగా అనేక రకాల వాటర్ యాక్టివిటిస్,  నైట్ బీచ్, ఫ్లోటింగ్ వాక్‌వే మరియు పాడెల్ కోర్ట్ వంటి ఎన్నో ప్రత్యేకతలు ఉన్నాయి.

బీచ్ ప్రాంతాన్ని రెండు భాగాలుగా విభజించారు. అల్ మమ్జర్ లగూన్ బీచ్ 2.75 మిలియన్ చదరపు అడుగుల విస్తీర్ణంలో ఉంటుంది.  ఇందులో 300-మీటర్ల నైట్ స్విమ్మింగ్ బీచ్, పిల్లల ఆట స్థలాలు, జిమ్‌లు, వాలీబాల్, ఫుట్‌బాల్ మరియు పాడెల్ ఆడటానికి వాటర్ స్పోర్ట్స్ జోన్‌లు, జెట్ స్కీ డాక్‌లు మరియు నీడ ఉన్న బీచ్‌ఫ్రంట్ ప్రదేశాలు ఉంటాయి.

మహిళల కోసం..

అదే సమయంలో, 1.25 మిలియన్ చదరపు అడుగుల విస్తీర్ణంలో ఉన్న అల్ మమ్జర్ కార్నిష్.. గోప్యత మరియు ప్రీమియం అనుభవాలను కోరుకునే సందర్శకులకు సేవలు అందిస్తుంది. ఇది ప్రపంచంలోనే మొట్టమొదటి, 24/7 పనిచేసే, కేవలం మహిళల కోసం మాత్రమే ఉద్దేశించిన, చుట్టూ కంచెతో కూడిన బీచ్‌ను కలిగి ఉంటుంది. ఈ ప్రాంతంలో క్రీడా సౌకర్యాలు, కళా ప్రదర్శనలు, మరియు కాలానుగుణ ఈవెంట్ స్థలాలు కూడా ఉంటాయి.

సైక్లింగ్ ట్రాక్

 500 మిలియన్ దిర్హమ్‌ల వ్యయంతో పూర్తి చేయబడిన ఈ బీచ్ లో  వాకింగ్ మరియు సైక్లింగ్ ట్రాక్‌తో సహా అనేక కొత్త సౌకర్యాలను ఏర్పాటు చేశారు. ప్రధానంగా తేలియాడే నడక మార్గమే అని, ఇది అల్ మమ్జర్ లగూన్ మరియు అల్ మమ్జర్ కార్నిష్‌లను కలుపుతుందని దుబాయ్ మునిసిపాలిటీలోని పబ్లిక్ బీచెస్ అండ్ వాటర్‌వేస్ కంట్రోల్ సెక్షన్ మేనేజర్ హమద్ షేకర్ తెలిపారు. రన్నర్లు మరియు సైక్లిస్టుల కోసం 5.5 కిలోమీటర్ల ట్రాక్ ఉందన్నారు.  

దివ్యాంగులకు స్పెషల్

ఈ నడక మార్గంలో ఒక వాటర్‌ఫ్రంట్ రెస్టారెంట్ ఉంటుంది. ఈ బీచ్ కార్యకలాపాలు ప్రారంభమైన మొదటి సంవత్సరంలో 7 మిలియన్లకు పైగా సందర్శకులు వస్తారని అంచనా వేస్తున్నారు. దివ్యాంగుల అవసరాలను తీర్చడానికి ఈ బీచ్ లో అన్ని విధాలా ఏర్పాట్లు చేశారు. వీటిలో భాగంగా స్విమ్ చైర్లు, వీల్‌చైర్ సౌకర్యం, ప్రత్యేక శిక్షణ పొందిన లైఫ్‌గార్డులు ఉన్నారని హమద్ తెలిపారు.

వాటర్ స్పోర్ట్స్  

బీచ్‌కు వచ్చే సందర్శకులు జెట్ స్కీయింగ్, కయాకింగ్, ప్యాడిల్ బోటింగ్ మరియు ఫ్లైబోర్డింగ్ వంటి అనేక రకాల వాటర్ స్పోర్ట్స్ కార్యకలాపాలను ఆస్వాదించవచ్చని వివరించారు.