చెన్నై: తమిళనాడు రాజకీయాల్లో తీవ్ర ఉత్కంఠ నెలకొంది. ముఖ్యమంత్రిగా ప్రమాణ స్వీకారం చేసి సరికొత్త అధ్యాయాన్ని లిఖించాలని భావించిన తమిళగ వెట్రి కళగం (TVK) అధినేత విజయ్‌కు గవర్నర్ నుంచి ఎదురుదెబ్బ తగిలింది. మెజారిటీ నిరూపణ విషయంలో నెలకొన్న సందిగ్ధతతో చివరి నిమిషంలో ప్రమాణ స్వీకార వేడుక రద్దు కావడం రాష్ట్రవ్యాప్తంగా చర్చనీయాంశంగా మారింది. విజయ్ రేపు ఉదయం 11:30 గంటలకు ముఖ్యమంత్రిగా ప్రమాణం చేసేందుకు అన్ని ఏర్పాట్లు చేసుకున్నారు. ఈ మేరకు ప్రభుత్వ ఏర్పాటుకు అనుమతి ఇవ్వాలని ఆయన గవర్నర్‌ను కోరారు. అయితే, ప్రస్తుత లెక్కల ప్రకారం టీవీకే పార్టీకి కాంగ్రెస్ (INC) ఎమ్మెల్యేలతో కలిపి కేవలం 112 మంది సభ్యుల మద్దతు మాత్రమే ఉంది. తమిళనాడు అసెంబ్లీలో ప్రభుత్వం ఏర్పాటు చేయడానికి అవసరమైన మ్యాజిక్ ఫిగర్ (118 సీట్లు) కంటే ఇది తక్కువగా ఉంది. స్పష్టమైన మెజారిటీ లేని పక్షంలో ప్రభుత్వం ఏర్పాటుకు అనుమతి ఇవ్వలేమని గవర్నర్ స్పష్టం చేయడంతో ప్రమాణ స్వీకారం నిలిచిపోయింది.

ప్రమాణ స్వీకారం రద్దు కావడంతో విజయ్ అప్రమత్తమయ్యారు. తన పార్టీ ఎమ్మెల్యేలెవరూ చేజారిపోకుండా ఉండేందుకు వారిని తదుపరి ఆదేశాలు వచ్చే వరకు రిసార్టులోనే ఉండాలని ఆదేశించారు. ఇతర పార్టీల నుంచి మద్దతు కూడగట్టేందుకు మరియు అసమ్మతిని అరికట్టేందుకు ఈ నిర్ణయం తీసుకున్నట్లు తెలుస్తోంది. ప్రస్తుతం ఉన్న 112 మందికి తోడుగా మరో ఆరుగురు ఎమ్మెల్యేల మద్దతు ఉంటేనే విజయ్ సీఎం పీఠాన్ని అధిష్టించే అవకాశం ఉంటుంది. దీంతో స్వతంత్రులు మరియు ఇతర చిన్న పార్టీల ఎమ్మెల్యేల కోసం గాలింపు ముమ్మరమైంది.

సస్పెన్స్‌లో తమిళ రాజకీయాలు
మరోవైపు డీఎంకే మరియు అన్నాడీఎంకే వర్గాలు కూడా మారుతున్న పరిణామాలను నిశితంగా గమనిస్తున్నాయి. విజయ్ ప్రభుత్వాన్ని ఏర్పాటు చేయకుండా అడ్డుకునేందుకు ఆ రెండు పార్టీలు లోపాయకారీ ఒప్పందాలు చేసుకుంటున్నాయనే వార్తలు కూడా వినిపిస్తున్నాయి. ఈ రాజకీయ అనిశ్చితి వల్ల తమిళనాడులో తదుపరి ఏం జరగబోతుందనేది ఇప్పుడు సస్పెన్స్‌గా మారింది. విజయ్ మెజారిటీని ఎలా నిరూపించుకుంటారు? లేక రాష్ట్రంలో మళ్ళీ ఎన్నికలు లేదా రాష్ట్రపతి పాలన వచ్చే అవకాశం ఉందా? అనే ప్రశ్నలు ఉత్పన్నమవుతున్నాయి. విజయ్ అభిమానులు మరియు టీవీకే శ్రేణులు ఈ పరిణామాలతో తీవ్ర నిరాశలో ఉన్నారు.