మస్కట్: వివిధ రంగాలలో సాంకేతిక సహకారాన్ని పెంపొందించే మార్గాలపై ఒమన్, ప్రపంచ బ్యాంకు చర్చలు జరిపాయి. ఒమన్ ఆర్థిక మంత్రిత్వ శాఖ.. ప్రపంచ బ్యాంకు గ్రూప్ ఒమన్ కంట్రీ మేనేజర్ వెండీ వెర్నర్ నేతృత్వంలోని ప్రపంచ బ్యాంకు ప్రతినిధి బృందంతో సమావేశమైంది. మంత్రిత్వ శాఖ ప్రధాన కార్యాలయంలో జరిగిన ఈ సమావేశంలో ఆర్థిక మంత్రిత్వ శాఖలోని 'ఒమన్ విజన్ 2040 అమలు పర్యవేక్షణ విభాగం' అధిపతి సయ్యద్ డాక్టర్ ముంథిర్ బిన్ హిలాల్ అల్ బుసైదీ పాల్గొన్నారు.  

ఈ సమావేశంలో ఇరుపక్షాలకు పరస్పర ఆసక్తి ఉన్న పలు అంశాలపై చర్చ జరిగింది. ప్రధానంగా ఇరువర్గాల మధ్య సహకారానికి గల అవకాశాలతోపాటు  ఆర్థిక వైవిధ్యీకరణ మరియు ఒమన్ లో లేబర్ మార్కెట్ సంస్కరణలపై ప్రధానంగా చర్చించారు.

పదవ పంచవర్ష ప్రణాళికలో సాధించిన ఆర్థిక పనితీరు సూచికలను మరియు 'ఒమన్ విజన్ 2040' సంబంధిత కార్యక్రమాల అమలులో సాధించిన పురోగతిని కూడా ఈ సందర్భంగా సమీక్షించారు. సమావేశం ముగింపులో ఇరుపక్షాలు తమ మధ్య సాంకేతిక సమన్వయాన్ని కొనసాగించడం ప్రాముఖ్యతను తెలియజేశారు. తదుపరి సమావేశాలలో కార్యాచరణ అంశాలతోపాటు ఉమ్మడి సహకారం కోసం విధివిధానాలను రూపొందించాలని ఇరువర్గాలు అంగీకరించాయి.