మస్కట్ః పెరుగుతున్న ఉష్ణోగ్రతల కారణంగా విద్యుత్ వినియోగం పెరిగే ప్రభావాన్ని తగ్గించే లక్ష్యంతో గృహ వినియోగదారులకు విద్యుత్ బిల్లులలో తగ్గింపును ప్రకటించారు.  మే నుండి ఆగస్టు ఉండే వేసవి కాలంలో ఒకే ప్రాథమిక ఖాతా కలిగిన గృహ వినియోగదారుల విద్యుత్ బిల్లులను తగ్గిస్తున్నట్లు 'ప్రజా సేవల నియంత్రణ సంస్థ' (APSR) ప్రకటించింది. ఈ కాలంలో విద్యుత్ సరఫరా నిలిపివేతలను (service disconnections) తాత్కాలికంగా నిలిపివేస్తామని, వినియోగదారులకు అండగా నిలిచేందుకు అనువైన చెల్లింపు ప్రణాళికలను ప్రవేశపెడతామని కూడా ఈ సంస్థ వెల్లడించింది.
వినియోగదారులకు ఉపశమనం
మే నెలలో, మూడు వేర్వేరు వినియోగ విభాగాలకు వర్తించే విద్యుత్ ఛార్జీల తగ్గింపులు ఈ విధంగా ఉంటాయి. మొదటి విభాగంలో 0 నుండి 4000 కిలోవాట్ల వరకు వాడే  వినియోగదారులకు బిల్లు మొత్తంలో 15% తగ్గింపు లభిస్తుంది.రెండవ విభాగంలో 4001 నుండి 6000 కిలోవాట్ల వరకు వినియోగించే వినియోగదారులకు బిల్లు మొత్తంలో 10% తగ్గింపు లభిస్తుంది. ఇక మూడవ విభాగంలో 6,001 కిలోవాట్ల కంటే ఎక్కువ వినియోగించే వినియోగదారులకు బిల్లు మొత్తంలో 5% తగ్గింపు లభిస్తుంది.
జూన్, జూలై మరియు ఆగస్టు 2026 నెలల్లో విద్యుత్ బిల్లులపై లభించే తగ్గింపులు చూస్తే.. మొదటి విభాగం వినియోగదారులకు 0 నుండి 4000 కిలోవాట్ల వరకు వాడే వారికి 20శాతం; రెండవ విభాగం వినియోగదారులకు 4001 నుండి 6000 కిలోవాట్ల వరకు 15శాతం, మూడవ విభాగం వినియోగదారులకు 6001 కిలోవాట్ల కంటే ఎక్కువ వాడేవారికి 10% తగ్గింపు లభిస్తుంది. ఇదిలా ఉండగా, ఆమోదించబడిన నియంత్రణ విధానాలకు అనుగుణంగా, విద్యుత్ బిల్లులను వాయిదాల పద్ధతిలో చెల్లించే వెసులుబాటును వినియోగదారులకు కల్పించాలని APSR లైసెన్స్ పొందిన విద్యుత్ సరఫరా సంస్థలను ఆదేశించింది.