మనామాః బహ్రెయిన్ పార్లమెంటు దేశ వినియోగదారుల రక్షణ చట్ట సవరణలను ఏకగ్రీవంగా ఆమోదించింది. వీటి ప్రకారం బహ్రెయిన్‌లోని వ్యాపారాలు 20,000 బహ్రెయిన్ దినార్ల (BD) వరకు జరిమానాలు, తాత్కాలిక మూసివేతలు మరియు వాణిజ్య రిజిస్ట్రేషన్ల సస్పెన్షన్‌ను ఎదుర్కోవచ్చు. 2026 డిక్రీ నెం. 18కి జతచేయబడిన 2012 నాటి చట్టం నెం. 35కు ఈ సవరణలను పార్లమెంటు ఆర్థిక మరియు వాణిజ్య వ్యవహారాల కమిటీ సిఫార్సు చేయగా, పార్లమెంటు దానిని ఆమోదించింది.
ప్రస్తుత చట్టం అమలు సమయంలో గుర్తించిన లోపాలను సరిదిద్దడానికి మరియు మారుతున్న మార్కెట్ పద్ధతులు, వినియోగదారుల ప్రవర్తనకు అనుగుణంగా ఈ మార్పులు ఉన్నాయని పరిశ్రమల మరియు వాణిజ్య శాఖ మంత్రి అబ్దుల్లా ఫఖ్రో తెలిపారు. ఈ సవరణల ప్రకారం..నిబంధనలను ఉల్లంఘించిన వారిపై చర్యలు తీసుకునే అధికారం మంత్రికి లేదా ఆయన నియమించిన అధికారికి ఉంటుంది. ఈ చర్యలలో భాగంగా వ్యాపారాలను మూడు నెలల వరకు మూసివేయడం, వాణిజ్య రిజిస్ట్రేషన్లను ఆరు నెలల వరకు సస్పెండ్ చేయడం, వాణిజ్య రిజిస్టర్ నుండి వ్యాపారాలను తొలగించడం మరియు పరిపాలనా జరిమానాలు విధించడం వంటివి ఉన్నాయి.