రియాద్ః సౌదీ భద్రతా దళాలు ఒక వారంలో మొత్తం 11,175 మంది అక్రమ నివాసితులను అరెస్టు చేశాయి. ఏప్రిల్ 30 నుండి మే 6 మధ్య కాలంలో సంబంధిత ప్రభుత్వ సంస్థల సహకారంతో నిర్వహించిన ఒక సంయుక్త ఆపరేషన్‌లో ఈ అరెస్టులు జరిగినట్లు అంతర్గత వ్యవహారాల మంత్రిత్వ శాఖ ప్రకటించింది. అరెస్టు అయిన వారిలో నివాస చట్టాన్ని ఉల్లంఘించిన వారు 6,153 మంది, సరిహద్దు భద్రతా చట్టాన్ని ఉల్లంఘించిన వారు 3,619 మంది మరియు కార్మిక చట్టాన్ని ఉల్లంఘించిన వారు 1,403 మంది ఉన్నారు.
సరిహద్దు దాటి సౌదీ రాజ్యంలోకి ప్రవేశించడానికి ప్రయత్నిస్తూ అరెస్టు అయిన వారి సంఖ్య మొత్తం 1,411గాఉంది. వీరిలో 36 శాతం మంది యెమెన్ జాతీయులు, 62 శాతం మంది ఇథియోపియా జాతీయులు మరియు రెండు శాతం మంది ఇతర దేశాలకు చెందినవారు ఉన్నారు. రాజ్యాన్ని విడిచిపెట్టి అక్రమంగా వెళ్ళడానికి ప్రయత్నిస్తూ మొత్తం 23 మంది అరెస్టు అయ్యారు.

మొత్తం 11,272 మంది అక్రమ నివాసితులను దేశం నుండి బహిష్కరించారు. అదే సమయంలో, ప్రయాణ పత్రాలను పొందడం కోసం 19,441 మంది ఉల్లంఘనదారులను వారి దౌత్య కార్యాలయాలకు పంపగా, 3,986 మందిని వారి ప్రయాణ రిజర్వేషన్లను పూర్తి చేసుకోవడం కోసం సంబంధిత అధికారుల వద్దకు పంపారు.

ఉల్లంఘనదారులకు రవాణా, ఆశ్రయం మరియు ఉపాధి కల్పించడంలో సహకరించిన సుమారు 19 మందిని కూడా అరెస్టు చేశారు. ప్రస్తుతం, 27,157 మంది పురుషులు మరియు 1,521 మంది మహిళలతో సహా మొత్తం 28,678 మంది విదేశీయులు, చట్టపరమైన చర్యలను అమలు చేసే ప్రక్రియలో ఉన్నారు.
వ్యక్తులు అక్రమంగా రాజ్యంలోకి ప్రవేశించడానికి సహకరించినా,వారికి ఆశ్రయం లేదా మరే ఇతర సహాయం  అందించినా... అటువంటి వ్యక్తులకు గరిష్టంగా 15 సంవత్సరాల జైలు శిక్ష మరియు 1 మిలియన్ సౌదీ రియాల్స్ (SR) వరకు జరిమానా విధిస్తామని అంతర్గత వ్యవహారాల మంత్రిత్వ శాఖ హెచ్చరించింది. అంతేకాకుండా, రవాణా కోసం ఉపయోగించిన వాహనాలను లేదా ఆశ్రయం కల్పించడానికి ఉపయోగించిన ఇళ్లను జప్తు చేస్తామని కూడా స్పష్టం చేసింది.
మక్కా, రియాద్ మరియు తూర్పు ప్రావిన్స్ ప్రాంతాలలో 911 నంబరుకు, అలాగే రాజ్యంలోని మిగిలిన ప్రాంతాలలో 999 మరియు 996 నంబర్లకు కాల్ చేయడం ద్వారా ఏవైనా ఉల్లంఘనల కేసులను నివేదించాలని మంత్రిత్వ శాఖ ప్రజలను కోరింది.