నాగచైతన్య-తమన్నాలది విజయవంతమైన జోడీ. '100%లవ్‌', 'తడాఖా' చిత్రాలతో వీళ్లిద్దరూ ఆకట్టుకొన్నారు. చైతూ, సమంత జోడీకి ఎంత పేరుందో, ఆ స్థాయిలోనే పేరు తెచ్చుకొన్న చైతూ-తమన్నా జోడీ మరోసారి వెండితెరపై కనిపించి మురిపించనున్నట్టు తెలుస్తోంది. అయితే సమంత కాదనడంతోనే ఆ స్థానంలో తమన్నా ఎంపికైందని ప్రచారం సాగుతోంది. నాగచైతన్య కథానాయకుడిగా కల్యాణ్‌కృష్ణ దర్శకత్వంలో త్వరలోనే ఓ చిత్రం తెరకెక్కబోతోంది. అదొక ప్రేమకథ. అందులో నాగచైతన్య, సమంత జోడీ నటిస్తారని ప్రచారం సాగింది. కానీ ఇప్పుడు సమంత స్థానంలో తమన్నా ఖరారైనట్టు తెలిసింది. అన్నపూర్ణ స్టూడియోస్‌ సంస్థ నిర్మించనున్న ఆ చిత్రం ఈ నెలలోనే మొదలయ్యే అవకాశాలున్నాయి.