కువైట్ః కువైట్ లో వాణిజ్య మంత్రిత్వ శాఖ బృందాలు ప్రత్యేక తనిఖీలు నిర్వహించాయి. అల్-రాయ్ ప్రాంతంలోని ఫ్రైడే మార్కెట్‌లో నకిలీ అంతర్జాతీయ ట్రేడ్‌మార్క్‌లతో కూడిన నకిలీ వస్తువులను విక్రయిస్తున్న తొమ్మిది దుకాణాలను వాణిజ్య మరియు పరిశ్రమల మంత్రిత్వ శాఖ సీజ్ చేసింది.

ఈ తనిఖీలకు అల్-రాయ్ సెంటర్ తాత్కాలిక అధిపతి ఫరాజ్ ముహమ్మద్ అల్-జాఫిరా మరియు వాణిజ్య ఇన్‌స్పెక్టర్ అలీ అల్-ఒవైహాన్ నాయకత్వం వహించారు. నకిలీ ఉత్పత్తుల అమ్మకానికి సంబంధించి అధికారులు తొమ్మిది ఉల్లంఘనలను నమోదు చేశారని, అనంతరం నకిలీ అంతర్జాతీయ బ్రాండ్‌లతో ఉన్న బ్యాగులు, బూట్లు మరియు టీ-షర్టులతో సహా 1,430 వస్తువులను స్వాధీనం చేసుకున్నారని మంత్రిత్వ శాఖలోని వాణిజ్య నియంత్రణ విభాగం డైరెక్టర్ ఫైసల్ అల్-అన్సారీ తెలిపారు.

ఉల్లంఘనలకు పాల్పడిన వారిపై అవసరమైన చట్టపరమైన చర్యలు తీసుకున్నామని, వారిని వాణిజ్య ప్రాసిక్యూషన్‌కు అప్పగించామని ఆయన తెలిపారు.మేధో సంపత్తి హక్కులను పరిరక్షించడం, వాణిజ్య మోసాలను ఎదుర్కోవడం మరియు మార్కెట్లను నియంత్రించడం కోసం కొనసాగుతున్న ప్రయత్నాలలో భాగంగా.. మంత్రిత్వ శాఖ తనిఖీ కార్యక్రమాలు కొనసాగుతాయని అల్-అన్సారీ పేర్కొన్నారు.