యూఏఈ: హోర్ముజ్ జలసంధి గుండా నౌకా రవాణాను నిర్వహించడానికి ఒక సార్వభౌమ పాలనా సంస్థగా తప్పుగా పేర్కొన్న "పర్షియన్ గల్ఫ్ స్ట్రెయిట్ అథారిటీ" అనే పేరుతో ఇరాన్ ఏర్పాటును తిరస్కరిస్తూ యూఏఈ మరియు నాలుగు అరబ్ గల్ఫ్ దేశాలు ఒక ప్రకటన జారీ చేశాయి. ఈ మేరకు యూఏఈ విదేశాంగ మంత్రిత్వ శాఖ తెలిపింది.
ఈ సంస్థ తన అధికార పరిధి అని చెప్పబడుతున్న దానిపై చేసిన తాజా ప్రకటన, ఆయా దేశాల సార్వభౌమాధికారాన్ని స్పష్టంగా ఉల్లంఘిస్తూ, యూఏఈతో సహా పొరుగు దేశాల ప్రాదేశిక జలాలను కూడా చేర్చినట్లు పేర్కొనడంపై అభ్యంతరం వ్యక్తం చేశాయి.
ఇది అంతర్జాతీయ చట్టాన్ని తీవ్రంగా ఉల్లంఘించడమే కాక, హోర్ముజ్ జలసంధి గుండా సురక్షితమైన నౌకాయానాన్ని సులభతరం చేయడంలో సమర్థవంతంగా పనిచేస్తున్న అంతర్జాతీయ సముద్రయాన సంస్థ (IMO)ను బలహీనపరుస్తాయి అని తెలిపింది. 
బహ్రెయిన్, కువైట్, ఖతార్ మరియు సౌదీ అరేబియా సంయుక్తంగా విడుదల చేసిన ఈ ప్రకటన.. ప్రపంచ చమురు మరియు ఎల్ఎన్జి రవాణాలో ఐదవ వంతు ప్రయాణించే హోర్ముజ్ జలసంధి గుండా ప్రయాణించడానికి ఇరాన్ ప్రతిపాదించిన ప్రత్యామ్నాయ మార్గాన్ని కూడా తిరస్కరించింది. ఐఎంఓ మారిటైమ్ సేఫ్టీ కమిటీ (ఎంఎస్‌సి) సమావేశం సందర్భంగా దీనిని జారీ చేశారు.

ఇరాన్ బెదిరింపులకు ప్రతిస్పందనగా గల్ఫ్ ప్రాంతంలో సురక్షిత నౌకాయానాన్ని ప్రోత్సహించేందుకు, యూఏఈ ప్రతిపాదించి.. అనేక సభ్య దేశాల సహకారంతో ఆమోదించిన ఒక తీర్మానాన్ని ఎంఎస్‌సి ఆమోదించడాన్ని యూఏఈ కూడా స్వాగతించింది.
యూఏఈ ఇంధన, మౌలిక సదుపాయాల శాఖ మంత్రి సుహైల్ మహమ్మద్ అల్ మజ్రూయీ మాట్లాడుతూ.. ఇరాన్ చట్టవిరుద్ధ చర్యల ఫలితంగా చిక్కుకుపోయిన 20,000 మందికి పైగా నావికుల భద్రతను నిర్ధారించడం యూఏఈకి అత్యంత ప్రాధాన్యత గల అంశమని చెప్పారు. ఆ దిశగా ఐఎంఓ సభ్య దేశాలు మరియు సంబంధిత అంతర్జాతీయ సంస్థలు అన్ని ప్రయత్నాలను కొనసాగించాలని ఆయన పిలుపునిచ్చారు.